Anna Luif

D Anna Luif (* 18. Februar 1972 z Züri) isch e Schwyzer Reschiseeri un Filmmacheri.

Lääbe

Dr Vater vu dr Anna Luif isch 1956 as 16-jeerige vu Ungarn uf Eeschtryych gflichte, het z Salzburg Matura gmacht un derno z Oslo Literaturwisseschaft studiert. As Studänt isch er im Rame vun eme Uusdusch uf Gämf chuu un het deert d Mueter vu dr Anna Luif chännegleert. D Familie vu ire Mueter isch noch eme Volksufstand 1956 vu Ungarn in d Schwyz gflichtet. D Eltere vu dr Anna Luif sin zäme uf Norweege, hän ghyroote un un di norweegisch Staatsbuurgerschaft iberchuu. Speeter sin si in d Schwyz uf Züri chuu. D Anna Luif un iri Schweschter sin z Züri uf d Wält chuu un im Quartier Witike ufgwagse. Bis si 21 gsii isch, het si ne norwegische Bass ghaa, anne 1993 het si s Schwyzer Buurgerräächt iberchuu, mittlerwyli het si au ne ungarische Bass. No dr Matura isch si drei Moonet lang dur Indie graist. Vu 1993 bis 1998 het si Film an dr Hochschuel fir Gstaltig un Chunscht Züri studiert. Dr Reschiseer Samir isch uf ire Abschlussfilm Diebe Vol 1–3 ufmerksaam woore un emänd isch si zur dr Zürcher Filmprodukzioonsfirma Dschoint Ventschr chuu, wi si 1999 e Praktikum absolviert het. Deert isch anne 2000 unter ire Reschy un no irem Draaibuech dr Chuurzfilm Summertime entstande. Dr Film iber e Maidli, wu si zum eerschte Mool verliebe duet, isch anne 2001 mit em Schwyzer Filmbryys uuszaichnet woore. No andere Chuurzfilm het si 2003 mit Little Girl Blue ire eerschte Spiilfilm gmacht. Är handlet vun eme Maidli, wu si in e Bue verliebt, derwylscht ire Vater e Verhältnis mit dr Mueter vum Bue het. S Draaibuech isch im Zämenaarbet mit em Micha Lewinsky entstande. Anne 2004 het d Anna Luif e Stell as Dozänti an dr Zürcher Hochschuel vu dr Chinscht aadrätte. Im Joor 2010 het si Reschy gfiert bim Spiilfilm Madly in Love iber en tamilische Bue in dr Schwyz, wu bi syre arranschierte Hochzyt d Liebi in d Qeeri chunt.

In dr 1990er Joor, bis anne 2001, het d Luif Gitarre gspiilt in dr Zürcher Maidli-Rockband Rosebud., derno et si in dr Independent-Band Niece gspiilt.

Anne 2010 isch d Anna Luif vu Züri uf Berlin zooge.

Filmografy

• 2000: Summertime
• 2003: Little Girl Blue
• 2010: Madly in Love

Weblink

• Anna Luif in dr Internet Movie Database
• Anna Luif bi filmportal.de
• Anna Luif bi swissfilms.ch
• Anna Luif uf cciiff.com
• Durch den Monat mit Filmemacherin Anna Luif (Teil 1): Berge und Bauern, ist das der Schweizer Spielfilm?, WOZ, 3. Februar 2011
• Durch den Monat mit Filmemacherin Anna Luif (Teil 2): Hollywood? Klar. Bollywood? Sicher. Aber wo ist Kollywood?, WOZ, 10. Februar 2011
• Durch den Monat mit Anna Luif (Teil 3): Hat Berlin Ihre Selbstwahrnehmung verändert?, WOZ, 24. Februar 2011
• Durch den Monat mit Filmemacherin Anna Luif (Teil 4): Sollen die Geschlechterrollen aufgelöst werden?, WOZ, 24. Februar 2011