Dr Schwyzer Filmbryys (dytsch Schweizer Filmpreis, franzesisch Prix du cinéma suisse, italienisch Premio del cinema svizzero, rätoromanisch Premi dal film svizzer) isch zum erschte Mol anne 1998 zue dr Soledurner Filmdäg verlihe wore. Syterhär isch er all Johr im Jänner bi dr Filmdäg vergee wore. Insgsamt sin in dr Vergangehait 600'000 Schwyzer Franke Bryysgälder, in sechs Kategorie, z Verfiegig gstande. Aafangs Merz 2009 het s zum erschte Mol e Färnsehgala im Schwyzer Färnseh unter Uusrichtig vum Bundesamt fir Kultur (BAK) un dr nei grindete Schwyzer Filmakademy stattgfunde. As Bryys-Trophäe git s dr „Quartz“, e Skulptur us em Mineral, wu 2008 dr bis dert verlihene „Viewfinder“ abglest het. D Uuszaichnig wird syterhär zue jedere Uflag vu Designer umgstaltet.

Gwinner vum Quartz 2012

Dr Schwyzer Filmbryys soll di Filmschaffenden us dr Schwyz fir ihri rusragende Film uuszaichne. D Jury bstoht us verschidene Personen us dr Beraich Kultur, Film un Medie. D Jury wird all Johr nei bsetzt. D Nominierige wäre dur e nyynchepfigi Kommission feschtglait, wu vum Aidgnessische Departement vum Innere gwehlt wird. Zuegloo sin Schwyzer Film, wu in däm Johr uf verschidene wichtige Filmfeschtival (Inland un Uusland) zaigt wore sin.

D Verleihig vum Filmbryys isch bis anne 2008 dur s Bundesamt fir Kultur uusgrichtet wore, zäme mit dr Partner Swiss Films, SRG SSR idée suisse un dr drei Schwyzer Filmfeschtival z Soledurn, z Locarno un z Nyon. Im Merz 2009 isch dr Schwyzer Filmbryys zum erschte Mol bi re Färnsehgala im Kultur- un Kongrässzäntrum Lozärn in zeh Kategorie vergee wore. Doderfir isch Ändi Juli 2008 d Schwyzer Filmakademy unter Laitig vum Filmmacher Fredi M. Murer grindet wore, wu zue Organisation vum Nominierigsverfahre het solle luege. S BAK het welle, ass d Filmakadaemy d Organisation ganz ibernimmt, die het aber abglähnt, vor allem us finanziälle Grind. Wäge däm het s Bundesamt fir Kultur schließli ab 2013 d Organisation wider sälber ibernuu.

Weblink ändere

  Commons: Schweizer Filmpreis – Sammlig vo Multimediadateie
  Dä Artikel basiert uff ere fräie Übersetzig vu dere Version vum Artikel „Schweizer_Filmpreis“ vu de dütsche Wikipedia. E Liste vu de Autore un Versione isch do z finde.