Dr Bärefelserhoof am Stapflebärg

47.5575388888897.5894194444444

Dä Artikel behandlet dr Bäärefelserhoof am Stapflebärg z Baasel. Für e Bärefelserhoof am Petersgraabe lueg doo.

Dr Bärefelserhoof

Dialäkt: Baseldütsch

Uschnitt us dr Stadtaasicht vom Matthäus Merian em Eltere im 17. Joorhundert
Wemm mä vom Määrtblatz (rächts unde) die Freiji Strooss uufe lauft, isch dr Schlüsselbärg die ersti Gass uf dr lingge Site. Dr Stapflebärg biegt gege linggs vom Schlüsselbärg ab, wo dä e Kurve gege rächts macht, und goot an dr Martinsgass, wo vo linggs chunnt, und am Augustinerklooster (15) rächts verbii bis zur Augustinergass.

Dr Bärefelserhoof isch e historischs Geböid in dr Schwizer Stadt Baasel. Er befindet sich in dr Groossbaasler Altstadt am Stapflebärg 9 und stoot uf dr Liste vo de Kulturgüeter im Kanton Basel-Stadt. Es isch e Seminarhuus vo dr Uniwersidäät Baasel worde, söll jetz aber wider zum e Woonhuus umbaut wärde.

Baugschicht

1602 het dr Johann Lucas Isely, wo men em Hans Lux Isely «dr Riich» gsäit het, s Huus am Egge vo dr Martinsgass und em Stapflebärg lo baue und het s mit em Geböid «Ysenburg» an dr Martinsgasse 16-18 verbunde, wo au iim ghöört het. Wo dr Isely 1626 gstorbe isch, si vo sim Riichdum nume Schulde übrig bliibe. S Geböid isch denn e Zit lang leer gstande und e baar Mol witerverkauft worde. Dr Junker Friedrich Christoph vo Bärefels het s 1748 kauft, und vo denn stammt dr Naame Bärefelserhoof. 1802 isch d Siidebandfabrigg «Gebr. Bischoff» in s Huus khoo und het s zun ere Fabrigg umbaut. Dr hinderi Däil vo dr Liigeschaft am Stapflebärg 7 het d GGG 1879 für d Frauenarbetsschuel kauft. 1895 het dr Staat die bäide Liigeschafte, Stapflebärg 7 und 9, kauft.

1916 het d Uniwersidäät Baasel s Geböid afo bruuche. Im Undere Kollegium het s nüm gnueg Blatz ghaa, wo s Oobere Kollegium gsi isch, het mä s Museum an dr Augustinergass baut und es het usgsee, wie wenn s no lang wurd goo, bis e nöis Kollegiehuus baut wurd, und dorum het mä Seminarie am Stapflebärg afo iirichde, und dr Bärefelserhoof isch äins vo dene Seminarhüüser worde. Zerst si s Theologische und s Filologische Seminar (Latiinisch und Griechisch) iinekhoo, s Seminar für Indogermanischi Sproochwüsseschaft, s Orientalische Seminar, s Historische Seminar, s Juristische Seminar, s Dütsche Seminar, s Änglische Seminar und s Staatswüsseschaftlige Seminar, wo denn im Vergliich zu hüte vil weniger Blatz brucht häi. In de Drissger Joor isch s äng worde und e baar Seminar häi nöji Häim gfunde. Im Bärefelserhoof si no s Dütsche, s Filologische und s Historische Seminar bliibe und s chliine Seminar für Indogermanischi Sproochwüsseschaft. Eso isch s bis in d 1970er bliibe. S Filologische und Indogermanistische Seminar si uszoge und schliesslig isch s Historische Seminar ans Hirschgässli 21 züüglet und s Dütsche und Slavische Seminar an dr Äschegraabe 9.

Im Bärefelserhoof isch bis 2007 s Romanische Seminar dehäim gsi, bis es an d Maiegass 51 züüglet isch. Denn het s Geböid wider zum e Woonhuus sölle umbaut wärde. 2016 isch dr Umbau fertig worde und s het din jetz Woonige, Büroo und Ateliee.

Kwelle

• Der Bärenfelserhof: Ort für die Seminarien der Universität uf dr Website vo dr Uniwersidäät Baasel

Lueg au

• Es het emol e zwäite Bärefelserhoof am Petersgraabe gee, wo 1956 abgrisse worde isch.