S Baasler Rhiischwümme

S Baasler Rhiischwümme isch en öffentligi Sportveraastaltig in dr Stadt Baasel. D Däilnäämer schwümme (oder lön sich lo driibe) öbbe fufzää Minute lang dr Rhii aabe vo dr Münsterfääri am Chläibaasler Rhiiufer bis zum undere Rhiiwääg. Si wärde drbii vo Böötli und Rettigsschwümmer begläitet. D Streggi isch öbbe 1,8 Kilometer lang.

Dialäkt: Baseldütsch

S Baasler Rhiischwümme findet sit 1980 jedes Joor am erste Zistig noch de Baasler Schuelferie statt, oder wenn das nid goot, e Wuche spööter. Es wird vo dr Schwizerische Lääbensrettig-Gsellschaft (SLRG) Sekzioon Baasel organisiert. S Schwümme foot am säggsi z Oobe am Kläibaasler Rhiiufer bi dr Münsterfääri aa. Wääred em Schwümme isch dr Rhii für e Schiffsverkeer gsperrt. Es mache vo meerer hundert bis meerere Duusig Schwümmer mit. Im Joor 2000, wo dr Summer bsundrigs häiss gsi isch, si s öbbe fümfduusig gsi. 2007 het mä zum erste Mol s Rhiischwümme wäge Hoochwasser müesse absääge.

Usser däm offizielle Rhiischwümme organisiert s Sportamt Baasel zwischen em 6. Juli und em Ändi vom August jeede Zistig e begläitets Rhiischwümme vo dr Solitüüd bim Tinguely-Museum bis zur Wettstäibrugg. Es chönne aber maximal 60 Schwümmer mitmache.

Näbe dene organisierte Aaläss isch s Schwümme im Rhii an warme Summerdääg e beliebts Baasler Hobby, aber sogar im Winter gits immer wider emol e Hampfle Schwümmer, wo sich nid lön lo abschregge. Es wird empfoole, em Nordufer nooch uf dr rächte Rhiisite z schwümme, und dört het mä au blaui Boje aagmacht, wo die sicheri Zone markiere. Äigetlig nume im Beriich vom Rhiihaafe und vom Kraftwärk und dr Schlöise z Birsfälde isch s Schwümme ganz verbote. Vo de Rhiibrugge us daf mä nid ins Wasser gumpe. Es git Schilder am Ufer und Website, wo uf d Gfoore ufmerksam mache. Wäge de Schiff, de Pfiiler vo de Brugge und dr Ströömig sötte aber nume gueti Schwümmer im Rhii go schwümme.

Weblingg

Commons: S Baasler Rhiischwümme – Sammlig vo Multimediadateie

Dä Artikel basiert uff ere fräie Übersetzig vum Artikel „Basler_Rheinschwimmen“ vu de dütsche Wikipedia. E Liste vu de Autore un Versione isch do z finde.