Bärner Konwänzioon

D Bärner Konwänzioon isch e Vertrag, wo der Öiroparoot ane 1979 gschribe het. Dä Vertrag het völkerrächtlechi Bedüütig. Dr Öiroparoot wott do drmit d Dier und d Pflanze, wo z Öiropa und drumume i wilde Naturrüüm lääbe, schütze.

Dr ganz Titel vo dämm Dokumänt isch uf Hochdüütsch: Übereinkommen über die Erhaltung der europäischen wildlebenden Pflanzen und Tiere und ihrer natürlichen Lebensräume.

Dr Name chunt drvo, ass dr Öiroparoot dr Vertrag z Bärn deponiert het, wo ne d Länder nodisno sind cho unterschrybe. Als letschti Länder sind bis jetz Georgie und Montenegro ane 2009 uf Bärn cho d Underschrifte bringe.

46 öiropäischi und au vier afrikanischi Länder sind der Konwänzioon byträtte, zum dr Naturschutz als wichtegi politischi Uufgab ärnscht z nää. Und au d EU isch es Mitgliid.

D EU het am 3. Dezämber 1981 wäge däm Vertrag d Vogelschutzrichtlinie und s Netzwärch «Natura 2000» und s Netz vo biogenetische Reserwat ygfüert. Jedes Land het eigeti Gsetz und Yrichtige, wo em Zwäck vo dr Bärner Konwänzioon nütze. I dr Schwiiz, wo dr Vertrag ane 1982 ratifiziert het, sind s Bundesgsetz übere Natur- und Heimetschutz vo 1966 und dr Artikel 78 vo dr Bundesverfassig die wichtigschte Grundlage. Düütschland het dr Vertrag 1984 ratifiziert; das Land het sid 2007 e nazionali Biodiversitätsstrategy. Frankrych het e groossi Zaal vo Nazionalpäärk und regionale Naturpäärk und andere Schutzpiet.

Weblink

• Convention on the Conservation of European Wildlife and Natural Habitats, Council of Europe
• 0.455 Übereinkommen über die Erhaltung der europäischen wildlebenden Pflanzen und Tiere und ihrer natürlichen Lebensräume, Schwiizer Dokumäntazioon zu dr Bärner Konwänzioon, uf admin.ch