Carl Albert Handschin

Dr Carl Albert Handschin (* 15. Dezämber 1849; † 13. Merze 1933 z Lieschtel) isch e Schwyzer Unternämer gsi. Är isch reformiert und Bürger vo Gälterchinde gsi.

Sys Läbe

Dr Carl Albert Handschin isch dr Soon vom Albrecht Handschin, Sattlermeischter und Buur, und dr Sara Mühlethaler gsi. Im Joor 1876 het är d Anna Freivogel vo Gälterchinde ghürotet.

Sy Bruef

Dr Carl Albert Handschin het z Gälterchinde und in dr Schwyzerhalle die chaufmännischi Leer gmacht. Als junge Brufsmaa het är sich wyterbildet. Vo 1874 bis 1883 het är als Verwalter vo dr Erschparniskasse Gälterchinde gschafft. In dr mechanische Schtikerei z Aarburg isch är chaufmännische Leiter und Teilhaber gsi.

Unternämer

Im Joor 1884 het är z Lieschtel e eigeni Schtikerei gründet; das isch dr Grundschtei vo dr spötere Textilfirma Hanro gsi. 1889 het är e Fabrik boue. Är het nach Frankrych und Ängland glyferet. In de Joore 1895 bis 1920 isch dr Carl Ronus als Teilhaber drzue cho. Jetz het die Firma Handschin und Ronus oder churz Hanro gheisse. Nach dr Umwandlig vo dr Firma in d Akziegsellschaft Hanro AG isch är dr Verwaltigsrotspresidänt gsi. Är isch au Verwaltigsrot gsi bi dr Basellandschaftliche Kantonalbank (als Presidänt) und der Basellandschaftliche Hüpotekebank. Bi dr Nazionalbank isch är Rechnigsrewisor gsi.

Politik

Vo 1901 bis 1911 isch dr Carl Albert Handschin Mitglyd vom Landrot gsi, 1907/08 Landrotspresidänt. Vo 1916 bis 1917 isch är im Liäschteler Gemeinrot gsässe.

Literarischi Verwys

• Autobiographischer Text, März 1920
• Biographisches Lexikon verstorbener Schweizer 2, 50

Extärni Verwys

• Kaspar Birkhäuser: Handschin, Carl Albert. In: Historisches Lexikon vo dr Schwiiz.
• Dr Carl Albert Handschin im Personelexikon vom Kanton Basel Landschaft (Site cha nüme abgrüeft wärde; Suche im Webarchiv)[1] [2] Vorlage:Toter Link/www.baselland.ch