Chaschper Bräwald

Dialäkt: Züritüütsch

De Chaschper Bräwald (* 1. Mai 1838 z Mänidorf, † 10. Juli 1899 z Züri) isch en Chaufme und Undernämer us Mänidorf gsi.

Japan-Mission vo 1863/64

De Chaschper (Caspar) Bräwald isch de Soon vom Beck Chaschper (Kaspar) Bräwald vo Mänidorf gsi. Är isch Chaufme worde und hät 1862 im Handelshuus Hunziker & Co z Aarau gschaffet. Vo 1863-1864 isch är Legationsrat und Sekretär gsi vo de Japan-Mission, won är vom Bundesrat Aimé Humbert-Droz mid erscht 24i mit em holländische Tampfschiff «Medusa» i säb Land gschickt worden isch. Deet händs am 6. Februar 1864 de erschti Handelsvertrag zwüsched Japan und de Schwiiz abgschlosse. De Chaschper Bräwald häd uusfüerlichi Pricht über die Reis veröffentlicht.^[1] Är häd au es Tagebuech gschribe. Die Notize uf Französisch, Änglisch, Italienisch und Holändisch sind uf 548 Siite und füled foif Bänd. Familiemitglider und s Bundesarchiv z Bärn händ si ufbewaart. Es gaat drin um Politik, Wirtschaft, Kultur, Gschicht und s tägliche Läbe. Vo 2008 bis 2012 händ d Firma DKSH und s Stadtarchiv vo Yokohama d Tagebüecher is Japanisch überträit.^[2]

Siber & Brennwald

Es Jaar druf, im 1865i, häd är z Yokohama mit em Hermann Siber d Handelsfirma Siber & Brennwald gründet. Mit däre Firma häd er vor allem Riis, Bauele und Side id Schwiiz exportiert und europäischi Produkt uf Asie pracht. Vo 1866 bis 1878 isch är a no Schwiizer Gäneralkonsul z Japan gsi. Nachane häd er bis 1882 d Londoner Filiale vo sinere Firma gläitet. D Firma isch 1890 füerend gsi im Sideexport.

Bim Kanto-Ärdbebe vo 1923 häd d Firma grossi Verluscht gha. De Willy Chäller vo de Ed. A. Keller & Co häd ghulfe, s Gschäft wider in Gang z bringe. Im Jaar 2000 händ sich d Ed. A. Keller & Co und d Diethelm & Co. Ltd. zämegschlosse, 2002 isch d Siber-Hegner dezu cho^[3] - de Allianzname häd de Name Bräwald 1910 verdrängt gha.^[4] Hüt ghäisst d Firma DKSH Holding (Diethelm Keller Siber Hegner) und häd 2013 mid über 26'000 Mitarbeiter fascht zää Milliarde Franke Umsatz und 300 Millione Franke Gwünn gmacht.^[5]

Weblink

Website vo de DKSH

Literatur

Siber Hegner - Hundert Jahre im Dienste des Handels, 1965, 7-18
Zürcher Chronik, Nr. 3, 1992, 4 f.

Fuessnoote

↑ Historisch Lexikon vo de Schwiiz
↑ Brennwald Diary translation project - Historical facts disclosed
↑ DKSH: Seit fast 150 Jahren in Asien
↑ More than 140 years of progress in Japan. Archiviert vom Original am 23. September 2014; abgruefen am 15. März 2014.
↑ DKSH 2013 mit neuem Rekordjahr in anspruchsvollem Marktumfeld (ufgruefe am 11. März 2014

[1] Historisch Lexikon vo de Schwiiz

[2] Brennwald Diary translation project - Historical facts disclosed

[3] DKSH: Seit fast 150 Jahren in Asien

[4] More than 140 years of progress in Japan. Archiviert vom Original am 23. September 2014; abgruefen am 15. März 2014.

[5] DKSH 2013 mit neuem Rekordjahr in anspruchsvollem Marktumfeld (ufgruefe am 11. März 2014

[1]

[2]

[3]

[4]

[5]