Catherine Repond

D Catherine Repond (au La Catillon gnännt) (* 18. Augschte 1663 z Villarvolard; † 15. Septämber 1731 z Frybùùrg) isch aini vu dr letschte Fraue gsii, wu in dr Schwyz as Häx aagschuldigt un hiigriichtet wooren isch.

Lääbe

D Catherine Repond, gnännt La Catillon, isch e Doochter vum Sulpice-Noë un dr Catherine (dr Nooname waißt mer nit) gsii un het mit ire boode Schweschtere im Doorf Villarvolard gwoont. Si het vum Bättle gläbt un het ab un zue Wulle us em proteschtantische Bärn gspunne, was mer in dr kadoolische Regioon missdröuisch aagluegt het. Wu Grücht iber aageebligi Häxerei d Rundi gmacht hän, het dr Vogt Beat-Nicolas vu Montenach e Untersuechig aagfange, go d Wooret vu dr Uussaage briefe.

Im April 1731 het dr Montenach di 68-jeerig Catillon zum eerschte Mool befrogt. Vor allem het er noch eme Uursprung vun ere Verletzig am linke Fueß gfrogt, wun ere d Zääche gfäält hän. Si het gsait, ass ere zwee Manne un e Frau die abghaue heebe, wu si in ere Schyyre z Gibloux ibernaachtet ghaa het. Die Uussaag het dr Vogt an ebis gmaant, wu e Zytlang voorhäär gsii isch: Uf dr Jagd het er e Fugs aagschosse ghaa un s Dier am Bai verletzt. Drotz ere lengere Suechi isch dr Fugs nit gfunde woore. Doodrus het dr Vogt gschlosse, ass d Catillon d Fähigkait mueß haa, ass si iri Gstalt cha wandle un ass si wäge däm däär Fugs in ere mänschlige Gstalt mueß syy. Am 20. Mai isch d Catherine Repond im Gfängnis vum Schloss Corbières inhaftiert woore, wu dr Vogt residiert het, go deert uf ire Brozäss waarte.

D Yywooner hän ere voorgwoorfe, ass si nit zue dr Hailige Mäss gieng un ass si mit ire Häxechinscht s Vii chrank mache diei un s Chees mache diei verhindere. Dr Dood vun eme Chind isch ere aaglaschtet woore; s het e Roos aaglängt ghaa, wu s vu dr Aagchlagte iiberchuu het. Am 4. Juuni het s nomool e Befroogig gee, wu d Catillon di nämlig Uussaag gmacht het wie im April. Dr Vogt het versuecht, si in Wiidersprich z verwigle, un wun em des nit glunge isch, het er si foltere loo, go d „Wooret“ ans Liecht bringe. Unter dr Folter het d Catherine Repond alles gsait, was mer vun ere het welle heere un het gstande ne Häx z syy. Si isch zum Dood veruurdailt un uf Frybùùrg brocht woore. Deert isch si nomool gfolteret woore, si het ire „Gständnis“ bsteetigt. Am 15. Septämber 1731 isch si verwoorgt un iri Lyych uf em Schyterhufe verbrännt woore.

Rehabilitierig

Im Februar 2009 het e Mozioon us em Frybùùrger Barlemänt d Widerhäärstellig vu dr Eer vu dr Catherine Repond verlangt. No dr Rehabilitierig vu dr Anna Göldi im Augschte 2008, wu anne 1782 wäge aageebliger Häxerei im Glaris hiigriichtet wooren isch, het d Frybùùrger Kantoonsregierig alli welle rehabilitiere, wu unter dr Folter Gständnis abglait ghaa hän. Di gfoorderet Rehabilitierig isch vum Kantoonsbarlemänt am 8. Mai 2009 abgläänbt woore, as Grund het mer aagee, e Rehabilitierig im juristische Sinn sei nit meegli; dr hitig Staat diei kai Verantwortig fir Verbräche im Ancien Régime draage. Statt däm isch e uuverbindligi Resoluzioon verabschiidet woore. Anne 2010 het d Stadt s Theema wider ufgriffe un entschiide, ne Blatz no dr Catherine Repond z nänne.

Literatur

• Nicolas Morard: Le procès de la sorcière Catherine Repond dite «Catillon»: superstition ou crime judiciaire ? In: Annales fribourgeoises, 1969–1970. Société d’histoire du canton de Fribourg, Freiburg/Ue., 1970, OCLC 491818245, S. 13–80.
• Josiane Ferrari-Clément: Catillon et les écus du diable. Editions La Sarine, Freiburg/Ue., 2008, ISBN 978-2-88355-122-0.
• Kathrin Utz Tremp: Muhlers Hexe: von der Prozess- zur Sagenhexe anhand eines Freiburger Beispiels. In: Maren Sziede, Helmut Zander (Hrsg.): Von der Dämonologie zum Unbewussten: die Transformation der Anthropologie um 1800 (= Okkulte Moderne; 1). De Gruyter Oldenbourg, Berlin / München / Boston, 2015, ISBN 978-3-11-037981-5, S. 167–182.
• Catherine Repond alias Catillon: die letzte Freiburger Hexe. In: Francine Castella (Hrsg.): Von Herzoginnen, Hexen und Hebammen (= Auf den Spuren von Frauen in Freiburg; 3). Pro Fribourg, ISSN 0256-1476, Heft 163, 2009/II, S. 40–43.

Weblink

• Kathrin Utz Tremp: Connaissez -vous… ? Schon bekannt? Catillon, eine Freiburger Hexe (1663–1731). (PDF; 619 kB) In: Staatsarchiv Freiburg. März 2009; abgruefen am 15. September 2021. 
• Kathrin Utz Tremp: Repond, Catherine. In: Historisches Lexikon vo dr Schwiiz. 19. August 2010.

Fueßnote

Dä Artikel basiert uff ere fräie Übersetzig vu dere Version vum Artikel „Catherine_Repond“ vu de dütsche Wikipedia. E Liste vu de Autore un Versione isch do z finde.