Charlie Hebdo

Charlie Hebdo [ʃaʁli ɛb'do] isch e franzesischi Satirezytschrift. Si erschynt syter anne 1992 z Paris all Wuche mit ere Druckuflag vu rund 140.000 Exemplar. Ain vu dr Grinder isch dr François Cavanna gsii. Charlie Hebdo giltet as bolitisch links un antiklerikal.

Ehmolige Sitz vu Charlie Hebdo an dr Rue Turbigo z Paris

Dr Name „Charlie“ chunnt vu dr Comicfigur Charlie Brown vu dr „Peanuts“ un verwyst uf d Urspring vu dr Zytschrift im Comicmagazin-Umfäld, „Hebdo“ isch di Franzesisch gängig Abchirzig fir «hebdomadaire» (Wuchezytschrift, Wucheblatt).

Gschicht

Charlie Hebdo isch anne 1969 us em verbotene Anarchomagazin Hara-Kiri firigange, wu ab 1960 all Monet erschine un zytwylig verbote gsii isch. Bis 1981 sin vu dr Wuchezytschrift insgsamt 580 Uusgaben erschine, derno isch s Magazin yygstellt wore. Anne 1992 isch d Redaktion vu Charlie Hebdo widerbeläbt wore.

Charlie Hebdo het anne 2006 zue dr wenige Zytschrifte ghert, wu d Mohammed-Karikature us dr dänische Jyllands-Posten noodruckt ghaa het. E Klag gege s Magazin vum Dachverband vu franzesische Muslim Conseil français du culte musulman (CFCM) dergege het s zueständig Pariser Gricht anne 2007 abgwise. S Blatt het in dr Johr syterhär immer wider au Karikature zum Thema Islam un Islamismus publiziert.

Anne 2010 het d Zytschrift e Brozäss gege di ultrakonservativ katholisch Organisation l'Alliance Générale contre le Racisme et pour le respect de l'Identité Française et chrétienne (Agrif) gwunne, wu gege si gchlagt het, wel in ere Uusgab zum Bsuech vum Papscht z Frankrych anne 2008 s Jesuwort „Leen d Chinder zue mer chuu“ in e pädophile Kontext gruckt woren isch.

Am 2. Novämber 2011 het s uf d Redaktionsryym vum Magazin e Brandaaschlag gee. Des het zuen ere landeswyte Solidaritetswälle gfiert. D Deeter sin nie gfasst wore, mer vermuetet si aber im islamistischen Umfäld.

Am 7. Jänner 2015 het s e Mordaaschlag uf d Redaktion gee, wu zwelf Mänsche derby ermordert wore sin, dodrunter dr Rusgeber un Zaichner Stéphane Charbonnier („Charb“), d Zaichner Jean Cabut („Cabu“), Bernard Velhac („Tignous“) un Georges Wolinski, dr Mitinhaber vum Blatt, Bernard Maris, d Kolumnischti Elsa Cayat un zwee Bolizischte. Mindescht 20 wyteri Persone sin zum Dail schwär verletzt wore. Di beede Deeter, wu em islamistischen Umfäld zuegrächnet wäre, sin am 9. Jänner 2015 vu dr Bolizei gstellt wore un bi me Schusswächsel verschosse wore. Noch em Aaschlag isch s in ganz Frankrych un derzue in vyl Städt uf dr ganze Wält zue Solidaritetskundgebige chuu. Z Paris hän am 7. Jänner rund 35.000 Mänsche demonschtriert, am 9. Jänner sin rund 700.000 Mänsche z Frankrych zue Kundgebige zämmechuu. Am 11. Jänner sin in ganz Frankrych iber 3,3 Millionen Mänsche bi Dröuermärsch derby gsii, dodervu rund 2 Millione z Paris.

Literatur

• Jane Weston: Charlie Hebdo and Joyful Resistance. In John Parkin, John Phillips (Hrsg.): Laughter and Power. Peter Lang, Bern 2006, ISBN 978-3-03910-504-5, S. 209–242 (Exzerpt (Google))

Weblink

 Commons: Charlie Hebdo – Sammlig vo Multimediadateie

• Websyte vu Charlie Hebdo