Georges Wolinski

Dr Georges Wolinski (* 28. Juni 1934 z Tunis; † 7. Jänner 2015 z Paris) isch e franzesische Comiczaichner gsii.

dr Georges Wolinski (2007)

Lääbe

Dr Wolinski isch dr Suhn vun eme polnische Jud un ere italienische Katholiki gsii. Anne 1946 isch er mit syne Eltere uf Frankrých chuu. No dr Schuel het er zerscht z Paris Architektur studiert, het s Studium aber abbroche. Derfir het er anne 1960 aagfange Comicstrip fir d Satrizytschrift Hara-Kiri z zaichne. Ab 1968 het er au fir s Satiremagazin L’Enragé gschafft un ab 1970 fir Actuel. Ab 1971 isch er Schefredakteur vum Magazin Charlie Mensuel gsii, derzue het er ab 1977 regelmäßig Cartoon fir d Dageszytig L’Humanité zaichnet. Au in dr Zytschrifte France Soir un Charlie Hebdo, em Noofolger vu Hara-Kiri, het er Cartoon publiziert.

Sy bekanntescht Wärch isch d Serie Paulette, wun er ab 1971 as Autor zämme mit em Zaichner Georges Pichard entwicklet het.

Dr Wolinski isch am 7. Jänner 2015 bim Terroraaschlag uf d Redaktion vu Charlie Hebdo z Paris ermordet wore. Bim glyche Aaschlag sin au dr Charb, dr Cabu, dr Tignous, dr Honoré, dr Bernard Maris, d Elsa Cayat un fimf wyteri Mänsche, dodrunder zwee Bolizischte, um s Läbe chuu.

Wärch (Uuswahl)

• Paulette, Zaichnige vum Georges Pichard
  • Paulette Tome 1, 1971
  • Paulette Tome 2, 1972
  • Le mariage de Paulette, Le Square, 1974
  • Paulette en Amazonie, Le Square, 1975
  • Ras-le-bol-ville, Le Square, 1975
  • Le cirque des femmes, Le Square, 1977
  • Les Pensées, Le Square, 1981
  • Paulette, Dargaud, 1984

Uuszaichnige

• Grand Prix de la Ville d’Angoulême uf em Festival International de la Bande Dessinée d’Angoulême (2005)

Weblink

 Commons: Georges Wolinski – Sammlig vo Multimediadateie

• lambiek.net (englisch)