Chaumont (Berg)
Der Chaumont isch e Bärg im Kanton Nöieburg.
Der Bärgname isch zämegsetzt us de zwöi frankoprovenzalische Wörter “chaux”, wo «Chalch» bedüütet, und “mont” für «Bärg». Zum alte Mundartwort chaux cha me vil bim Wälschschwiizer Mundartwörterbuech GPSR vo der Uni Nöieburg go nochelääse.[1]
Es isch e längzogni Hööchi vo der erschte Bärgchetti vom Jura, wemme vom Middelland uus luegt. Er foot bi der Stadt Nöieburg öschtlech vo der Schlucht vom Seyon a und ziet sech gäge Nordoschte öpe zwölf Kilometer wyt id Lengi, won er a der Gränze zum Kanton Bärn id Uuslöifer vom Chasseral überegoot.
Im Südweschte isch uf em Bärg s grodete Piet, wo me en schöni Uussicht ufe Nöieburgersee und bis zu den Alpe het; dört isch der höchscht Punkt vo däm Bärgdeil, der Chaumont du Signal, uf der Höch i vo 1171 Meter über Meer. Ufem Bärgrügge sind vil Alpsidlige und Feriehüüser. Vo Nöieburg uus goot sid 1910 en elektrischi Standseilbaan ufe Bärg, s Funiculaire du Chaumont, wo chly meh weder zwöituusig Meter lang isch;[2] der Uussichtsturm dört obe isch anne 1912 bout worde.[3]
Der Chaumont het sid em 19. Joorhundert es Signal vo der Schwiizer Landesvermässig gha.
-
d Bärgstazioon vom Chaumont-Bäänli -
e Gletscherfindling ufem Chaumont
Fuessnoote ändere
- ↑ Lueg im Artikel chaux bim Glossaire des patois de la Suisse romande online
- ↑ Ville de Neuchâtel. Les Funiculaires
- ↑ Aussichtsturm Chaumont i der Datebank für Inscheniöörbouwärch Structurae