Christa Heimann-Buß

D Christa Heimann-Buß (* 8. Augschte 1946 z Sitzechilch as Christa Buß) isch e dytschi Dialäktautoori.

Lääbe

No dr Volksschuel het d Christa Buß Chauffrau gleert. Anne 1966 het si dr Artur Heimann vu Chander ghyroote, si hän zäme zwee Siin. Vu 1982 bis 1997 het si z Sitzechilch en chlaine Chauflade gfiert, wu si vu ire Mueter ibernuu ghaa het.

Si duet si in vyl Verain eerenamtli engaschiere, unter anderem isch si 30 Joor lang im Voorstand vum Markgreefler Draachteverain Chander gsii.

Anne 1980 het si aagfange mit schryybe, vor allem Gediicht uf Markgreefler Alemannisch, derzue au Chuurzgschiichte. Ire eerscht Gediichtband „Herztröpfli“ het si 1992 uusegee, syterhäär het si nomool drei Gediichtbänd vereffetligt. Fir dr „Bund Heimat und Volksleben“ het si au greeßeri un chlaineri Theaterstuck gschriibe. Im Joor 1999 het si mit em Musiker Werner Wißner un em Dialäktdiichter Hansfrieder Geugelin s „Trio Blauewind“ grindet, wu bis um dood vum Geugelin anne 2019 Dialäktlieder in dr Aart vum tradizionälle Volkslied gsunge het. E Dail Gediicht un Gschiichte vun ere uf Alemannisch un Hoochdytsch sin au in Anthologie uusechuu, z. B. in weleweg selleweg.

Anne 2015 het si bim Wettbewäärb Loorer Murre dr zweet Bryys in dr Kategory Lyrik gwunne.

Wäärch

Herztröpfli. Resin-Verlag, Binzen 1992
Fotzel-Schnitte. Resin-Verlag, Binzen 1995
Seelefäde. Resin-Verlag, Binzen 2000
Sternezit. Alemannische und Hochdeutsche Gedichte, Lieder und Geschichten von Advent bis Drei König. Verlag Waldemar Lutz, Lörrach 2006
Trio Blauewind: Blauewind. CD. 2002

Literatur

Autoren aus dem Dreiländereck. In: Alemannisch dunkt üs guet I/II 2000, S. 20–21

Weblink

d Christa Heimann-Buß uf dr Websyte vu dr Muettersproch-Gsellschaft
Gemeinsam sind sie Mitglied in 15 Kanderner Vereinen, Badische Zeitung, 27. Augschte 2016