Christiane Brunner

D Christiane Brunner (* 23. Meerz 1947 z Gämf, haimetberäächtigt z Egg) isch e Schwyzer Bolitikeri (SP).

d Christiane Brunner

Lääbe

D Brunner isch as Doochter vun ere Schnyyderi vu St. Galle in aifache Verhältnis ufgwagse. Iiri Familie gheert dr methodistische Chilche aa. No dr Matura het d Brunner mit eme Stipändium Jura studiert.

Anne 1969 isch d Christiane Brunner Grindigsmitgliid vu dr Frauebefreiigsbeweegig (FBB) gsii. Vu 1976 bis 1978 het si as Jurischti im Bundesamt fir Soziaalversicherige gschafft, vu 1980 bis 1989 in ere Aawaltspraxis z Gämf.

Vu 1981 bis 1990 isch d Brunner Mitgliid vum Gämfer Kantoonsroot gsii, vu 1982 bis 1989 Bresidänti vum Schwyzerische Verband vum Personaal vu dr effetlige Dienscht (VPOD) un vu 1983 bis 1987 Bresidänti vu dr soziaalbolitische Kummissioon vu dr Soziaaldemokraatische Bartei vu dr Schweiz. Wu s anne 1989 e Volksabstimmig zue dr Schwyzer Armee gee het, het si d Brunner derfir uusgsroche, ass d Armee abgschafft wird.

In dr Gwäärkschaft isch d Brunner vu 1992 bis 2000 Bresidänti vum Schwyzerische Metall- un Uhrenarbaiterverband (SMUV) gsii, vu 1994 bis 1998 derzue au Co-Bresidänti vum Schwyzerische Gwäärkschaftsbund (SGB). Anne 1991 isch d Brunner in Nazionaalroot gweelt woore, wu si Mitgliid vu dr Kummissioon fir soziaali Sicherhait un Gsundhait gsii isch un vu dr Kummissioon fir Wiirtschaft un Abgaabe. D Brunner isch aini vu dr Iniziatorne vum landeswyte Frauestraik („Lila Streik“) am 14. Februar 1991 gsii.

d Ruth Dreifuss un d Christiane Brunner am 8. Meerz 1993

Bi dr Bundesrootswaal am 3. Meerz 1993 het d Brunner as Kandidaati vu dr SP d Noofolog vum René Felber im Bundesroot sotte aadrätte. Di buurgerli Barlemäntsmeehait het aber ire Barteikamraad Francis Matthey gweelt, was zue grooße Brotescht gfiert het – vor allem dur Fraue. Dr Matthey het druf uf d Aanaam vu dr Waal verziichtet. Fir di nei Waal am 10. Meerz het d SP mit dr Christiane Brunner un dr Ruth Dreifuss derno zwoo Kandidaatene bresäntiert – gweelt oore isch im dritte Waalgang emänd d Dreifuss.

Bi dr Waal 1995 isch di bishäärig Nazionaalreeti Brunner fir dr Kantoon Gämf in Ständeroot gweelt woore. Deert isch s Mitgliid vu dr Räächtskummissioon, dr Kummissioon fir soziaali Sicherhait un Gsundhait un vu dr Kummissioon fir Ussebolitik woore un ab 1999 in dr Staatsbolitische Kummissioon. Bi dr Waale 2007 het si nimi kandidiert.

Bi dr diefe Barteikriise noch em Abgang vu dr Ursula Koch isch d Christiane Brunner im Oktoober 2000 zue däre ire Noofolgeri as SP-Barteibresidänti gweelt woore. Si het d Bartei bis Meerz 2004 gfiert.

D Brunner isch zwoosproochig.

Weblink

 Commons: Christiane Brunner – Sammlig vo Multimediadateie

• Christiane Brunner uf dr Websyte vo dr Bundesversammlig
• Literatur vu un iber Christiane Brunner im Katalog vu dr Dütsche Nazionalbibliothek
• Marie-Josée Kuhn: Die Unfassbare zum Anfassen. In: WoZ. 20. Oktober 2000

Fueßnote

Dä Artikel basiert uff ere fräie Übersetzig vu dere Version vum Artikel „Christiane_Brunner_(Politikerin,_1947)“ vu de dütsche Wikipedia. E Liste vu de Autore un Versione isch do z finde.