Coghuf

Dr Coghuf (äigentlig Ernst Stocker; * 28. Oktober 1905 z Basel; † 13. Februar 1976 z Spiegelbärg), isch e Schwizer Mooler, Zäichner und Bildhauer gsi. Er het au Wanddeppig und Glasfänster entworfe.

Lääbe

Dr Ernst Stocker isch e Soon vom Gärtner und Zugfüerer Johannes Stocker gsi und dr jüngeri Brueder vom Hans Stocker. Vo 1920 bis 1924 het er e Usbildig as Kunstschlosser gmacht und bim Louis Weber Bildhauerei gleert. Vo 1925 bis 1927 isch er z Bariis bi sim Brueder gsi, het as Kunstschlosser gschafft und het dr Jacques Lipschitz kennegleert. Er het au no bim Willi Baumeister studiert. Under em Psöidonüüm Coghuf het er sich ganz dr Moolerei verschriibe. Sid 1928 isch er Mitgliid vo dr Künstlergrubbe Rot-Blau II gsi, wo wider nöi gründet worden isch. Vo 1927 aa het er Wandbilder an öffentliche Geböid gmoolt, under anderem s Bild «Beweegig» für d Basler Hauptbost. Denn het er sich meermols im Usland ufgthalte, unter anderem isch er vo 1931 bis 1932 z Bariis an dr Académie de la Grande Chaumière gsi. 1934 het er ghulfe die churzlääbigi Künstlergrubbe BBZ 8 z gründe. 1935 isch er in d Freibärg züüglet, vo 1946 bis 1976 het er z Spiegelbärg (Muriaux) gläbt. Vo 1957 aa het er Glasfänster für Chille z Basel, z Lajoux, z Münster, z Milhuusa, z Peseux und noch bi sym Woonort z Soubey und usserdäm e baar Tapisserie und Emailarbäite gmacht.

1939 het er d Hedwig Rudin ghürootet. Si häi zämme zää Chinder gha.

Litratuur

Tapan Bhattacharya: Coghuf. In: Historisches Lexikon vo dr Schwiiz.
Coghuf, Gedächtnisausstellung. Hans Stocker, Jubiläumsausstellung. Texte: Maria Netter, Max Robert, Peter Friedli. Kunsthalle Basel, Basel 1976
Coghuf. Texte: Jean-Pierre Beuret et al. Association Coghuf, Saignelégier 1986.
Emil Szittya: Neue Tendenzen in der Schweizer Malerei. Mit Abbildungen von Camenisch, Coghuf, Hindenlang, Staiger, Stocker, Sulzbachner. Paris 1929.

Weblingg

Coghuf. In: Sikart (Lexikon un Datebank zue dr Chunscht in dr Schwyz un im Firschtetum Liechtestei).

Dä Artikel basiert uff ere fräie Übersetzig vum Artikel „Coghuf“ vu de dütsche Wikipedia. E Liste vu de Autore un Versione isch do z finde.