Cornelia Gassner

D Cornelia Gassner (* 1. Mai 1958 z Grabs, Kanton St. Galle as Cornelia Matt; † 15. Dezämber 2016 z Muura) isch e liechteschtainischi Bolitikeri (FBP) gsii. Vu 1993 bis 1997 isch si Regierigsreeti mit dr Ressort Böuwääse un Vercheer gsii. D Gassner isch dodermit di eerscht Frau in ere liechteschtainische Regierig gsii.

Lääbe

D Cornelia Gassner isch anne 1958 im Spital z Grabs uf d Wält chuu. Iri Eltere sin dr Zaantächniker Egon Matt un däm syre Frau Waltraud geb. Ritter gsii. Si het vier Gschwischter ghaa, dodrunter di speeter Bolitikeri Andrea Matt. Vu 1970 bis 1978 isch si uf s Liechtestainisch Gimnasium z Vaduz gangr un het deert iri Matura gmacht. Derno het si vu 1978 bis 1984 z Innschbruck Räächtswisseschaft studiert. Anne 1984 het si zum Dr. iur. promoviert. Derno het si vu 1985 bis 1986 an dr London School of Economics and Political Science studiert un het deert anne 1986 en Master of Laws (LL.M.) iiberchuu. Vu 1987 bis 1997 het si as Mitarbaiteri in eme Aawalts- un Dreihandbiro z Vaduz gschafft un het si derno 1997 as Dreihänderi sälbschtändig gmacht. Ab 2000 het si as sälbschtändigi Räächtsaawälti gschafft. Vu 2000 bis 2002 isch si Bresidänti vu dr Gsellschaft Schwyz–Liechteschtai gsii. Dernääbe isch d Gassner vu 2001 bis 2004 Dozänti an dr Fachhochschuel Liechteschtai z Vaduz gsii. Vu 2003 bis 2005 het si em Verwaltigsroot vu dr Spitalregion Rhyntel-Werdeberg-Sarganserland aagheert un ab 2006 em Verwaltigsroot vu dr Liechteschtainer Volksblatt AG. Speeter isch si Mitgliid bzw. Bresidänti vum Verwaltigsroot vu dr Liechteschtai TeleNet AG un dr Telecom FL AG un vu dr us dr Fusion vu däne baid Unternäme 2008 entstandene Telecom Liechteschai gsii.

D Gassner isch Buurgeri vu dr Gmai Triesebärg gsii. Si isch syter 1980 ghyroote gsii mit em Arthur Gassner (* 1956) un het drei Chinder ghaa. Anne 1994 isch ere s Komturchryz vum Fiirschtli Liechteschtainische Verdienschtoorde verliie woore.

Weblink

• Redaktion HLFL: Gassner, Cornelia. In: Historischs Lexikon vom Förschtatum Liachtastaa.

Fueßnote

Dä Artikel basiert uff ere fräie Übersetzig vu dere Version vum Artikel „Cornelia_Gassner“ vu de dütsche Wikipedia. E Liste vu de Autore un Versione isch do z finde.