Crêt de la Neige

Der Crêt de la Neige isch der hööchscht Bärg vom Juragebirge. Sin Gipfel isch uf 1720 Meter über Meer.

der Crêt de la Neige,
linggs hinde der Reculet

der Name

Der Bärg- und Fluername Crêt chunt us der frankoprovenzalische Sprooch, er isch s glyche wie s altfranzösische creste und s düütsche «Kreete». Beidi chöme vo der latynische Wurzle crista und bedüüte «Felsgrat» und mängmol au algemein eifach «Bärg». Im wälsche Jura könnt me dä Name vo vilne Plätz, öppen au bi Crêt Malherbe, Crêt de la Perdrix und Crêt du Midi. Me findet zu däm Fluername, wo i verschidene Variante im ganzen Alperuum und au susch z Frankrych vorchunt, vil etymologischi Informazioone und Bischpiil im Wälschschwiizer Mundartwörterbuech, em GPSR, vo der Uni Nöieburg.

Geografy

Der Bärg ghört zu der vorderschte Bärgchetti vom Jura weschtlech vo Gämf, und er lyt im französische Departemänt Ain. Er isch öppe 1300 Meter höcher als d Stadt Gämf. Uf der Oschtsyte lyt under em Crêt de la Neige d Ebeni vom Pays de Gex und uf der Weschtsyte isch s Valserine-Tal.

S Gschtei vom Bärg isch us Chalch aufbout. Es sind Sedimäntgschtei us der Jurazyt. uf der Höchi obe isch der Fels durlöcheret, es het Dolyine und Chaarefälder und s Wasser versikeret im Bärg, wo’s drin divärsi Höline muess gää, wo me bis jetz no wenig vonne könnt.

Der Gipfel Crêt de la Neige isch nid e Bärg, wo uf allne Syte frei stoot, sondern meh en Gupf ufem längzogne Bärgrügge, wo sech vo der Klus bi der Rhone füfzää Kilometer wyter im Südweschte bis zum Bärgpass Col de la Faucille zää Kilometer im Nodoschte vom Gipfel hiziet. I der Nöchi vom Crêt de la Neige sind no anderi Juragipfel, wo fasch glych höch sind: der Le Reculet (1719 m), der Grand Crêt (1702 m) und der Bärg Le Colomby de Gex (1688 m). Die Bärgregion vom Jura isch en Oort mit ere grosse biologische Vilfalt; es het oben a der Baumgränze wyti Alpmatte mit vil alte Trochemuure. Öppis bsunders isch, ass im Jura einzig am Crêt de la Neige vil Bärgfööre vorchöme, wo susch nume i den Alpen läbe. Der Bärg isch im Naturreservat Réserve naturelle nationale Haute Chaîne du Jura, wo mit emene Dekret vo der französische Umwältminischterin Ségolène Royal anne 2011 gründet worden isch. D Behörde vom Naturschutzpiet undersueche zäme mit em Labor für alpyni Ökology vo der Uni Grenoble d Biotop i dere Landschaft.

Vo dört obe het me bi guettem Wätter en Uussicht uf d Alpe und im Nordoschte über die ganze Jurachetti übere sogar bis zu de Vogese und em Schwarzwald.

Zum Bärgpass Col de Crozet i der Nöchi vo dene Gipfel chame mit Säilbaane vo beide Syte ufe, vo Crozet im Oschte und vo Làlex im Weschte. Der Bärgstock isch e Deil vo der Uusflugsregion vo Gämf.

Literatur

• Patrice Prunier, Aurélie Boissezon: Du Reculet aux sommets alpins. Quels changements sur les crêtes? usegää vo der Réserve naturelle nationale Haute Chaîne du Jura 2017.

Weblink

 Commons: Crêt de la Neige – Sammlig vo Multimediadateie

• Website vom Naturreservat Réserve naturelle nationale Haute Chaîne du Jura