«Dr Peloponnesisch Chrieg»

Dr Peloponnesisch Chrieg isch dr Ditel, wo mä im Dütsche für s Gschichtswärk über e Peloponnesisch Chrieg vom antike griechische Historiker Thukydides brucht. S Wärk gältet as e Klassiker und äins vo de eltiste Gschichtsbüecher im modärne Sinn.

E Manuskript vom Gschichtswärk vom Thukydides us em 10. Joorhundert.

Dr Peloponnesisch Chrieg behandlet d Eräignis in dr Usenandersetzig zwüschen em Attische Seebund under dr Füerig vo Athen und em spartanische Peloponnesische Bund bis zum Joor 411 v. d. Z. Dr Xenofon het denn in sinere Hellenika die letschte Joor vom Chrieg beschriibe.

Hüte gits Wüsseschaftler, wo s Wärk as en objektivs und wüsseschaftligs Gschichtswärk aaluege, anderi wie dr W. R. Connor gseen s as e literarischs Wärk, und dr Thukydides isch in iire Auge e Künstler, wo sis Material sorgfältig usliist und zämmesetzt und eso s sümbolische und emozionelle Potenzial usschöpft.

Dr Inhalt vom Wärk

S Wärk isch in dr Spootantike in acht Büecher iidäilt worde.

S erste Buech behandlet d Zit vor em Chrieg und d Gründ für e Chrieg (433-432 v. d. Z.), s zwäite (431-428) beschribt dr Aagriff vo Theebe uf Plataiai, d Iifäll vo de Spartaner in Attika und d Epidemii in Athen. Im dritte Buech (428-425) goot s um die jöörlige Iifäll in Attika, um dr Ufstand vo Mytilene, dr Fall vo Plataiai und d Reakzioon vo Athen. Im vierte Buech (425-423) isch die athenisch Bsatzig vo Pylos uf em Peloponnes beschriibe, e Waffestillstand und spartanischi Friidensaagebot, wo dr Athener Kleon ableent, d Erooberig vo Amfipolis dur e Spartaner Brasidas, d Eräignis in Sizilie. Im fümfte Buech (422-415) chömme dr Athener Kleon und dr Spartaner Brasidas um, dr Nikiasfriide wird abgschlosse und Athen versklavt d Insle Melos. S säggste Buech beschribt d Zit vo 415 bis 414 mit em athenische Fäldzuug gege Sizilie und em Verroot vom Alkibiades, s sibte (414-413) d Niiderlaag vo Athen in Sizilie und d Vernichdig vo sinere Armee und Flotte und s achte (413-411) dr Ufstand in Ionie, d Iimischig vo de Perser, die politischi Instabilidäät vo Athen udn d Schlacht vo Kynossema, wo die athenisch Flotte die spartanisch gschlaage het.

Fuessnoote

Dä Artikel basiert uff ere fräie Übersetzig vum Artikel „History_of_the_Peloponnesian_War“ vu de änglische Wikipedia. E Liste vu de Autore un Versione isch do z finde.