Dietz-Werner Steck

Dialäkt: Schwäbisch

D Dietz-Werner Steck – eigentlich hot’r bloß Werner mit Vornama ghoißa – (* 30. Juli 1936 z Waiblenga, † 31. Dezember 2016 en Stuegert) ischt a deitscher Theader- ond Fernsehschauspiiler gwäa, wo bsonders durch sei Roll als Ernst Bienzle en 25 Tatort-Folga bekannt worra ischt.

Aus seim Leaba

Vo 1959 bis 1962 hot sich dr Steck an dr Staatlicha Hochschuel fir Musik ond Darstellende Kunscht en Stuegert zom Schauspiiler ausbilda lassa. An dera Schuel hot-em sei Lehrere Lilly Ackermann (1891–1976) do Root geba, sein Vornama Werner mit-em Nama Dietz zo vorbenda, ond des hot’r au gmacht. Noch seim Studium isch dr Steck Mitglied vom Wirdabergischa Staatstheader en Stuegert worra. Neabaher hot’r emmer mol wiider au a Roll am Alda Schauspiilhaus Stuegert ibrnomma ond hin ond wiider au an auswärdige Bihna a Gaschtspiil geba, so zom Beischbiil em Johr 1995 bei de Burgfeschtspiil z Jagschdhausa als Götz von Berlichingen em gleichnamiga Schauspiil vom Johann Wolfgang von Goethe, em Johr 2000 z Fissa em Allgai als Richard Wagner em Musical Ludwig, 2008 am Stadttheader Konstanz als Willy Lohmann em Drama Der Tod eines Handlungsreisenden vom Arthur Miller.

1991 hot dr domolige Siddeitsche Rundfunk – heitzodag Sidweschtrundfunk (SWR) – em Steck oobodda, en seine neie Folga vo dr erfolgreicha Fernseh-Krimi-Serie Tatort da Hauptkommissar Ernst Bienzle zo spiila. Dr Steck hot dui Roll gern oognomma ond en 25 Folga gschbiilt, zom ledschda Mol em Johr 2007. Dr Felix Huby, wo dui Bienzle-Figur erfonda ond de meischde Drehbiacher zo deane Folga gschriiba hot, hot doo driaber naus au noh a Theaderstick vorfasst, nemlich Bienzle und der Mord am Neckar, wo-nr seim Freind Steck uff da Leib gschriiba hot. Des Werk hot am 27. Mai 2006 z Stuegert am Alda Schauspiilhaus sei Uruffihrong erleabt.

Noch seira Tatort-Zeit hot dr Steck noh Rolla em SWR seine em schwäbischa Dialekt firs dridde Programm inszeniirde Seria Laible und Frisch ond Die Kirche bleibt im Dorf gschbiilt.

Dr Dietz-Werner Steck ischt vo 1959 bis zo seim Ableaba mit seira Frau Hanna vorheiradet gwäa. Aus dera Ehe send mehrere Kender hervorganga, wo au wiider Kender gebora hend.

En seine ledschde Lebensjohr ischt’s em Steck gar nemme guad ganga. Noch-ma Schlägle^[1] ond zwoi Oberschenkelhalsbrich ischt’r em Stuegerter Stadtdoil Birkach en a Pflegeheim komma.^[2] Deet hot’r an Silveschder 2016 seine Auga fir emmer gschlossa.^[3] 80 Johr alt isch seller Moo worra.

A Auswahl vo de Film, wo-nr dren mitgschbiilt hot

En dr Reihe Tatort

Als Neabadarsteller

1973: Tatort: Stuttgarter Blüten
1974: Tatort: Gefährliche Wanzen
1979: Tatort: Zweierlei Knoten
1980: Tatort: Kein Kinderspiel
1982: Tatort: Blinde Wut
1986: Tatort: Einer sah den Mörder
1987: Tatort: Spiel mit dem Feuer
1991: Tatort: Tod im Häcksler

Als Hauptdarsteller en de Bienzle-Folga

1992: Bienzle und der Biedermann
1993: Bienzle und die schöne Lau
1994: Bienzle und das Narrenspiel
1995: Bienzle und der Mord im Park
1995: Bienzle und die Feuerwand
1998: Bienzle und der Champion
1999: Bienzle und der Zuckerbäcker
1999: Bienzle und die blinde Wut
2001: Bienzle und der heimliche Zeuge
2003: Bienzle und der Tod im Teig
2004: Bienzle und der steinerne Gast
2005: Bienzle und der Feuerteufel
2006: Bienzle und der Tod in der Markthalle
2006: Bienzle und der Tod im Weinberg
2007: Bienzle und die große Liebe
2007: Bienzle und sein schwerster Fall

Sonschdige

Vo 2005 bis 2008 hot’r en 39 Folga vo dr TV-Serie Ein Fall für B.A.R.Z mitgschbiilt.
Vo 2005 ond 2009 hot’r en zwoi Folga vo dr Hamburger Bolezei-Serie Großstadtrevier mitgschbiilt.
Vo 2009 bis 2010 hot’r en zwelf Folga vo dr SWR-Serie Laible und Frisch mitgschbiilt.
Vo 2011 bis 2012 hot’r en dr SWR-Serie Die Kirche bleibt im Dorf mitgschbiilt.

Ehronga

Fir seine schauspilerische Leischdonga en dr Tatort-Serie ischt em Dietz-Werner Steck em Johr 2002 d Vordinschtmedallje vom Land Bada-Wirdaberg vorliha worra. Fenf Johr druff ischt dr Steck en Stuegert weaga seine Vordenscht oms Oseha vo dr bada-wirdabergischa Bolezei zom Ehrakommissar ernannt worra.^[4]

Weblink

Dietz-Werner Steck in dr Internet Movie Database
Dietz-Werner Steck bi filmportal.de

Oinzlne Nochweis ond Fuaßnoda

↑ Em Schwäbischa wuud an Schlagoofall – sogar an ganz graußer ond schlemmer – en dr Regl euphemisdisch bloß als Schlägle bezeichnet.
↑ https://www.tz.de/stars/tatort-star-dietz-werner-steck-schwer-krank-sein-leben-pflegeheim-zr-6641657.html
↑ http://www.stuttgarter-nachrichten.de/inhalt.dietz-werner-steck-tatort-ermittler-bienzle-ist-tot.9d4ff309-19b8-4994-8f38-2df21413f881.html
↑ Schauspieler Steck wird Ehrenkommissar des Landeskriminalamtes. Pressemitteilung des Landes Baden-Württemberg, 9. Januar 2007.

Dä Artikel basiert uff ere fräie Übersetzig vu dere Version vum Artikel „Dietz-Werner_Steck“ vu de dütsche Wikipedia. E Liste vu de Autore un Versione isch do z finde.

[1] Em Schwäbischa wuud an Schlagoofall – sogar an ganz graußer ond schlemmer – en dr Regl euphemisdisch bloß als Schlägle bezeichnet.

[2] ttps://www.tz.de/stars/tatort-star-dietz-werner-steck-schwer-krank-sein-leben-pflegeheim-zr-6641657.html

[3] ttp://www.stuttgarter-nachrichten.de/inhalt.dietz-werner-steck-tatort-ermittler-bienzle-ist-tot.9d4ff309-19b8-4994-8f38-2df21413f881.html

[4] Schauspieler Steck wird Ehrenkommissar des Landeskriminalamtes. Pressemitteilung des Landes Baden-Württemberg, 9. Januar 2007.

[1]

[2]

[3]

[4]