Dinner for One

Dinner for One (au under em Titel Der 90. Geburtstag oder i de Kombination Dinner for One oder Der 90. Geburtstag oder Dinner for One – The Same Procedure as Every Year bekannt) isch e Färnsehproduktion vom NDR us em Jahr 1961. Si isch ds erst Mal i de Sändig Lassen Sie sich unterhalten gloffe. In de äbefalls vom NDR produzierte Sändig Guten Abend, Peter Frankenfeld isch de Sketch am 8. März 1963 usgstrahlt worde. Es handlet sich um ne öppe 18-minütige Sketch vom änglische Komiker Freddie Frinton mit synere Partneri May Warden. Regie gfüert het de Heinz Dunkhase, au wenn de Frinton dr eigentlichi Schöpfer vo de Inszenierig gsi isch. De ursprünglichi Autor isch de Brit Lauri Wylie. Die Yleitig i der dütsche Version redt de Heinz Piper.

D Handlig mit em Fästmahl zum 90. Geburtstag vo de Miss Sophie, wo vo irem Butler James serviert wird, bestaht us ere Reie Running Gags. De Butler lauft währed de Gschicht es paarmal um de Tisch, zum die vier verstorbene Gest vo de Miss Sophie z bediene, und stolperet gäng wider über es Tigerfäll am Bode. Der James serviert der Miss Sophie Suppe u derzue Sherry, Fisch u Wysswy, Güggeli u Champanier u zum Abschluss Frücht mit Portwy. I es paar Szene isch im übrige sehr guet z gseh, das der Freddie Frinton über beidi Ohre grinset. Wenn är sech aber wider zum Publikum dräjt, verschwindet das Lache sofort wider.

Z Dütschland isch Dinner for One e feste Bestandteil vom Silväster-Programm vom dritte Programm vo de ARD. D Sändig isch Kult. Au i de Schwiiz wird si jedes Jahr am Silvästerabig zeigt. Im Schwiizer Färnseh lauft en eigeni Version vom Sketch, wo 1963 im Studio Bellerive z Züri dräiht worden isch. D Schwiizer Version isch allerdings 11 Minute läng und somit 7 Minute chürzer als d Version vom NDR. Was under anderem aber ou da drann lyt, das di ganzi Yleitig uf Dütsch fählt. Zuedäm isch ds Bühnebild andersch. So fählt ds Schmine, d Stäge isch vil tiefer u der Gong fählt. Dä fählt, da d Miss Sophie uf d Bühni chunt, ohni das sie vom James mit em Gong grüeft wird. Es fähle ou e paar Filmszene us der 61er Version. D Version vom Schwiizer Fernseh het zuedäm e andere Titel: Dinner for One – The Same Procedure as Every Year.

Es het ou e colorierti Version vo däm Sketch gä. Der NDR het 1999 das Sketch nächdräglech la coloriere u het die Version zum Jahreswächsel 1999/2000 ds erscht Mal usgstrahlt. Sythär bringt der Sänder die Version allpott wider emal.

Au wenn di beide Schouspiler wo d Miss Sophie u der Butler James spile sälber Brite sy, isch ds Sketch z Grossbritanie praktisch unbekannt.

Weblink

 Commons: Dinner for One – Sammlig vo Multimediadateie

• Dinner for One in dr Internet Movie Database
• Dinner for One in dr Online-Filmdatebank
• Wer sind eigentlich Freddie Frinton und May Warden? Mit Video «Dinner for One».
• Schnittbericht zur Schweizer Fassung
• einestages: „Dinner for Every-One“
• Dinner for One: Script (Memento vom 18. Septämber 2005 im Internet Archive) (englisch)