Öiropafahne

Dr Öiropafahne isch ane 1955 vom Öiroparoot ygfüert worde als nöis Sümbool vo dere Ländergmeinschaft, wo 1949 entstanden isch.

dr Öiropafahne

das wäär en anderi Idee für en Öiropafahne gsi

Gschicht

Am 8. Dezämber 1955 het s Minischterkomitee vom Öiroparoot nach vil Vorarbete und Diskussioone pschlosse, dä Fahne sig jetz für alli Sache vom Öiroparoot gültig.

Mit der Zyt sin bi vil verschidene internazionale Greemie z Öiropa ganz divärsi Fähne ufchoo. Ane 1979 het derno s Öiropäische Parlamänt die visuelli Vilfalt welle korigiere, und so isch bim Öiroparoot und bim öiropäische Parlamänt abgmacht worde, ass sid 1986 dä blaugääl Stärnefahne s Zeiche vo alnen Instituzioone vo dr EG wärdi. Und hüzetags bruucht men en als algemines Sümbool vo dr Öiropäischen Union.

wie me dr Fahne tuet zeichne

s Bild ufem Fahne

S Bild vom Fahne gseht so us: Ufem blaue Grund stoot e chranz vo zwölf Stärne, und jede Stärn isch füüfzaggig.

Wie viel Stärne ass es sy, het nüt z tue mit dr Zahl vo de Mitgliidländer vo dr EU oder vom Öiroparoot; hüt – anne 2019 – sind s jo 49 Länder im Öiroparoot und 28 i dr EU. As es zwölf Stärne sind, chunt dervo, das s Fahnebild eso i jedere Grössi guet uusgseht, und drzue au no wil d Zahl Zwölf e grossi kulturelli Bedüütig het.

Intressant isch, ass me nie usegfunde het, wäär eigentlech das so wytume bekante Fahnebild zeichnet het; i de Archyvdokumänt vo de öiropäischen Organisazioone und vo persönliche Ussage vo Lüüt wo dozmol mit der Sach z tue gha hän – es sin dr Arsène Heitz, dr Paul M.G. Lévy, dr Hanno F. Konopath und dr Arthur Eisenmenger – git’s divärsi Imformazione do derzue.

dr Öiropafahne zmitz i de andere Fääne bi dr Drüüländerbrugg bi Hüünige, Wyyl und Basel

wie me das Sümbol bruucht

Wie dr Fahne ufghänkt wird, isch bi der EU und i de Länder ufem Kontinänt i de Fahnereglemänt gnau aggää.

I dr Schwiiz, wo sid 1963 bim Öiroparoot derby isch, seit s Fahnereglemänt vom Bund im Artikel 8, wänn ass dr Öiropafahne ufem Bundeshuus z Bärn und uf de andere Hüüser, wo der Äiggnosseschaft ghööre, mues uufzoge wärde.

Das Stärnezeiche isch au uf gwüssne offizielle Sache vo de öiropäische Länder: em Euro, uf de Autodafele usw.

Me gseht das Fahnebild i vilne Wariante ganz algemein als Zeiche füre Kontinänt Öiropa, au bi Länder usserhalb vo der EU und sogar a mängem ganz privaten Oort. Es git keis ygschränkts Rächt zum s Sümbol z bruuche, es isch es freis Bild und nid öpen e ytreiti Marggä.

Literatur

• Roland Bieber: Die Flagge der EG. In: Wilfried Fiedler, Georg Ress: Verfassungsrecht und Völkerrecht: Gedächtnisschrift für Wilhelm Karl Geck. Carl Heymanns, Köln/ Berlin/ Bonn/ München 1989, ISBN 3-452-21362-5, S. 59–77.
• Carlo Curti Gialdino: I Simboli dell'Unione europea, Bandiera – Inno – Motto – Moneta – Giornata. Istituto Poligrafico e Zecca dello Stato S.p.A., Roma 2005, S. 80–85.

Weblink

 Commons: dr Fahne vo dr Öiropäischen Union – Sammlig vo Multimediadateie

• d Gschicht vom Öiropafahne