Froueschdimmrächt i der Schwiz
S Froueschdimmrächt i der Schwiz (Stimm- u Wahlrächt) uf eidgnössischer Ebeni isch dür en eidgnössischi Abschdimmig am 7. Februar 1971 igfüehrt worde. Formell ischs Froueschdimmrächt am 16. Merz 1971 würksam worde. D Schwiz isch so eis vo de letschden europäische Länder gsi, wo sire wibleche Bevölkerig di volle Bürgerrächd zugschdande hei, aber si isch s erschde Land gsi, wo s dür e Vouchsabschdimmig (vom männleche Deil vo der Bevölkerig) bassiert isch.
Uf der Ebeni vo Schuel- und Chile hei d Kantöön s Froueschdimmrächt hüüffig scho früener iigfüert gha. Uf politischer Ebeni si di eerschte Kantön mit Froueschdimmrächt d Waadt u Nöieburg (beidi 1959) u de Gämf (1960) gsi. Bis zur Ifüehrig vom Froueschdimmrächt i allne Kantön si allerdings no witeri 20 Jahr vergange: Am 27. Novämber 1990 hets Bundesgricht ere Chlag vo Froue us em Kanton Appezäll Innerrode Rächt gä und het drmit d Verfassigswidrigkeit vo der Innerrhoder Kantonsverfassig i däm Punkt beschdätigt.[1] So het Appezäll Innerrhode as letschde Kanton s Schdimmrächt für Froue uf kantonaler Ebeni igfüehrt, gäge Mehrheitsentscheid vo de Männer a der Landsgmeind am 29. April 1990.
Dr Houptgrund für di verglichswis schboti Umsetzig lit im politische Syschdem vo der Schwiz. Bi Vorlage, wo d Verfassig bedräffe, entscheidet elei s schdimmberächdigte Volk zäme mit de Ständ (Kantön). Um s Schdimmrächt uf de verschidne Ebine ifüehre zu chönne, hets immer d Mehrheit vo de schdimmberächdigte Männer brucht. Uf nationaler Ebeni isch zuedäm s Schdändemehr nötig gsi, aso d Mehrheit vo de zueschdimmende Kantön.
Weblink
ändere
Commons: Froueschdimmrächt i der Schwiz – Sammlig vo Multimediadateie- Dossier: Frauenstimmrecht, Publiziert 11. August 2009, Aktualisiert 27. September 2011 (Memento vom 18. April 2013 im Webarchiv archive.is) Vil Videos zum Thema im Dossier uf «SF Wissen»
- Politische Teilrechte für Frauen in Kantonen und Gemeinden, Eidg. Kommission für Frauenfragen, Zur Geschichte der Gleichstellung in der Schweiz 1848 – 2000 (Memento vom 29. Juni 2007 im Internet Archive) PDF-Datei uf frauenkommission.ch
Quelle
ändere- ↑ Bundesgrichtsurteil vom 27. Novämber 1990. In: Amtliche Sammlung der Entscheidungen des Schweizerischen Bundesgerichts. Abgruefen am 25. Dezember 2010.