Fritz Maurer

Dr Fritz Maurer isch am 11. Oktobr 1901 z Diepflige uf d Wält cho und am 20. Jänner 1991 z Gälterchinde gschtorbe. Är isch reformiert, Gälterchinder und Diepfliker Eerebürger, Politiker und Unternämer gsi.

Sys Läbe

Dr Fritz Maurer isch dr Soon vom Fritz Maurer und dr Maria Louise Mohler gsi. 1927 het är d Bertha Ritter vo Buus ghürotet. Är isch z Böckte in d Bezirksschuel und het Chaufmaa gleert.

Dr Unternämer

Dr Fritz Maurer het d Drukerei „Farnsburg“ und d Zytig „Gälterchinder Aazeiger“ gründet. 1930 het d Sydebandwäberei, die „Oberi“ oder „Roti Fabrik“ z Gälterchinde zuedo. Är het die 1936 chönne chaufe und het dörte e Forellezucht betrybe. Är het sich über die schlächti Kualitet vo de Welopnö gergeret und beschlosse sälber Reife z produziere; so het är, wo us em Gebiet vo Maloja z Graubünde schtammt, d Einzelfirma „Pnö- und Gummiwärk Maloya“ gründet. Zerscht het är numme Welopnö, schpöter au Schuesoole, Pnö für Töff, Auti und sogar Reife für Flugzüg produziert.

Politik und Vereinsläbe

Dr Fritz Maurer isch vo 1947 bis 1956 Landrot und vo 1963 bis 1967 Nationalrot gsi. Är het sich bsunders für d Vercherspolitik schtark gmacht. Är isch e aktive und guete Schütz und e yfrige Turner gsi. Als Wachmeischter isch är im Unteroffiziersverein Mitglyd gsi.

D Pnöfabrik Maloya

D Pnöfabrik Maloya het dr Name Gälterchinde wytumme bekannt gmacht und dr Umgäbig vo Gälterchinde Arbetsplätz und Verdienscht brocht. 1986 het dr Firmegründer Fritz Maurer si 85schti, d Maloya yre 50schte Geburtstag und yre sibemillionschte Reife chönne fyre. Rund 400 Persone hei bi dr Maloya gschafft. Scho 1989 het aber d Belegschaft müese verchlynert wärde und 1993 het d Erfolgsgschicht Maloya es abrupts Ändi gno, d Produkzion isch ygschtellt und die letschte 200 Persone wo no dört gschafft hei si, bis uf 17, entlasse worde. Uf Ändi 2004 het d Maloya denn yri Tor ändgültig gschlosse.

Literarischi Verwys

• Basellandschaftlichi Zytig vom 8. Oktobr 1981 und 24. Jänner 1991. U.B.
• Volksstimme vom Fritig, 29. Oktobr 2004 Syte 3

Extärni Verwys

• Kaspar Birkhäuser: Fritz Maurer In: Historisches Lexikon vo dr Schwiiz.
• Dr Fritz Maurer im Personelexikon vom Kanton Basel Landschaft (Site cha nüme abgrüeft wärde; Suche im Webarchiv)[1] [2] Vorlage:Toter Link/www.baselland.ch
• Volksstimme von Baselland / Artikel: „Einst Gelterkindens Flaggschiff“ (Site cha nüme abgrüeft wärde; Suche im Webarchiv)[3] [4] Vorlage:Toter Link/www.volksstimme.ch