Gertrud Burkhalter

D Gertrud Burkhalter (* 9. Jänner 1911 z Biel im Bärnbiet; † 6. Mai 2000 z Züri) isch e Schwiizer Erziehere, Bibliotekarin und Mundartschriftstellere gsi.

Läbe und Schaffe

D Burkhalter isch z Pieterle bi Biel uufgwachse, het di Höcheri Töchtereschuel z Züri psuecht und het den as Sekretärin vom Schriftstelleer Max Pulver, und au as Huusleerere und Jurnalischtin gschaffet. Vo 1946 bis 1973 isch si Bibliotekarin vo dr Pestalozzi-Biblioteek z Züri gsi.

Ane 1942 het si s erschte Wärch useggä, es Theaterstuck für Laieschauschpiiler. Drufabe het si gueti Gedicht gschribe, wo in Samelbänd usechoo und i dr Schwiiz sofort guet ufgnoo worde sind. Us deil Gedicht sind Lieder gmacht worde, mit Melodie vom Komponischt Alfred Stern, useggä bim Musig-Hug z Züri. Ane 1980 sind dr Gertrud Burkhalter iry Dichtige bim Wyss-Verlag z Bärn erschine.

Es bekants Gedicht isch öpe D Chilchemagd.

Für ires literarische Schaffe het d Burkhalter Uuszäichnigen übercho:

• d Eeregoob vom Kanton Züri, 1964
• de Literaturprys vo de Schwiizerische Schillerstiftig, 1981
• de Buechprys vom Kanton Bärn, 1982

Dr Nachlass vo dr Gertrud Burkhalter isch idr Burgerbiblioteek Bärn.

Wärch

• Das Lehen. ein Laienspiel, 1942
• Stygüferli. Gedichte, 1943
• Heligeland. Gedichte, 1957
• Alfred Stern: Zwei weihnächtliche Mundart-Lieder nach Gedichten von Gertrud Burkhalter, 1959
• Alfred Stern: Zwei Heimatlieder nach Mundart-Gedichten von Gertrud Burkhalter, 1960
• Alfred Stern: Zwei tröstliche Lieder nach Mundart-Gedichten von Gertrud Burkhalter, 1964
• Momänte. Berndeutsche Gedichte, 1980

Literatur

• Carl Seelig: Begegnung mit Gertrud Burkhalter. In: Schwyzerlüt. Zytschrift für üsi schwyzerische Mundarte, 21, 1959–1960, Syte 121–123.
• Schriftstellerinnen und Schriftsteller der Gegenwart. 1988, Syte 37.
• H. Erpf, B. Traber: 50 Jahre Berner Schriftsteller-Verein. 1989, Syte 36 f.
• Wilhelm Kosch (u. a.): Deutsches Literaturlexikon. Das 20. Jahrhundert. Biographisch-bibliographisches Handbuch Band 4, Züri Münche 2003, Spalte 645.

Weblink

• Karin Marti-Weissenbach: Gertrud Burkhalter In: Historisches Lexikon vo dr Schwiiz.
• Gertrud Burkhalter uf literapedia-bern.ch