Grand Café Odeon
S Grand Café Odeon isch e Café im Wiener Jugedstiil mit ere biwegte Gschicht am Bellevue i de Stadt Zöri. S Odeon mit de alte Iirichtig im Jugedstiil stoot hütt under Denklmoolschutz.
Gschicht
ändereAne 1910 het de Chaufmaa Julius Uster bim Bellevueplatz e grooses Huus baue loo, de Usterhoof. Allerdings het er sich finanziell öberlupft und de Bau isch is stocke choo. Well er aber denn s groossi Loos i de spanische Nationallotterie gwune hett, isch Bau doch no fertig wore.
Am 1. Juli 1911 het de Münchner Wert Josef Schottenhaml s Café Odeon im Parterre uuftue, mit ere aigne Konditorai. Im erste Stock isch e “Billard-Akademie” mit zwölf Billardtisch und e Cabaret gsii. S Odeon het sich schnell zomene Treffpunkt vonere kulturelle und intelektuelle Elite entwicklet.
Im Erscht Weltchrieg isch s Odeon e Treffpunkt vo intelektuelle Flüchtling gsi, au de Ulrich Wille, de Schwiizer General dozmool, het zo de Chundschaft vom Odeon ghört. Nochem Chrieg isch s Odeon zomene Treffpunkt vo de Dadaiste wore. Au wääred em Zwaite Weltchrieg isch s Odeon wider e wichtige Treffpunkt vo intelekutelle Flüchtling gsii.
Noch em Zwaite Weltchrieg isch s Odeon witter e Treffpunkt vo junge Intelktuelle blibe. Am 5. Hornig 1966 isch im Odeon 50 Joor Dadaismus gfiiret woore. 1967 het de Odeonwert Schwarz anere Künstleri mit Minirock e Huusverbott ggee. Drufabe isches zonere fridliche Demonstration cho, mir Slogans wie “Odéon libre!” oder “Amnestie für alle!”.
Nochem Globuskrawall ane 1967 isch s Odeon immer mee zom Treffpunkt vo Hippies, Freaks und Rocker wore und scho glii het sich d Drogeszene immer mee bimerkbar gmacht. Immer hüüfiger isch randaliert wore. Noch Schlägeraie zwöschet Drogedealer isch s Odeon am 9. Mai 1972 gschlosse wore.
S Odeon isch drufabe originaltroi renoviert wore und uf e Drittel vo de uursprüngliche Grössi verchlinneret woore. S Cabaret und de Billardruum sind verschwunde. D Noieröffnig vom Grand Café Odeon isch em 18. Dezember 1972 gsii. S Odeon isch au deno no bis zomene gwösse Grad Treffpunkt vo Intelektuelle und Künstler gsii und i de 1980 und 1990er Joor au e bliebte Schwuletreffpunkt gsii.
Prominenti Gäst vom Odeon
ändereHans Arp, Friedrich Dürrenmatt, Albert Einstein, Max Frisch, Wilhelm Furtwängler, Claire Goll, James Joyce, Else Lasker-Schüler, Franz Léhar, Lenin, Hugo Loetscher, Klaus Mann, Erich Maria Remarque, Carl Seelig, William Somerset Maugham, Friedrich Torberg, Arturo Toscanini, Frank Wedekind, Franz Werfel, Ulrich Wille, Stefan Zweig. Aageblich söll d Tänzeri Mata Hari im Cabaret vom Odeon uftrette sii.
Literatur
ändere- Curt Riess: Café Odeon; Verlag Europa, Züri 2011. ISBN 978-3-905811-24-7.
Link
ändere
Commons: Odeon Zürich – Sammlig vo MultimediadateieKoordinate: 47° 22′ 3,7″ N, 8° 32′ 42,7″ O; CH1903: 683583 / 246906