Hermann Mayer Salomon Goldschmidt

Dr Hermann Mayer Salomon Goldschmidt (* 17. Juni 1802 z'Frankfurt am Main, † 26. April 1866 z'Fontainebleau) isch e dytsch-französische Astronom un Chunstmoler gsi.

**entdeckti Asteroide: 14**
(21) Lutetia	15. November 1852
(32) Pomona	26. Oktober 1854
(36) Atalante	5. Oktober 1855
(40) Harmonia	31. März 1856
(41) Daphne	22. Mai 1856
(44) Nysa	27. Mai 1857
(45) Eugenia	27. Juni 1857
(48) Doris	19. September 1857
(49) Pales	19. September 1857
(52) Europa	4. Februar 1858
(54) Alexandra	10. September 1858
(56) Melete	9. September 1857
(61) Danaë	9. September 1860
(70) Panopaea	5. Mai 1861

Dialäkt: Markgräflerisch (Ebringe)

Dr Goldschmidt isch dr Suhn vume jüdische Chaufma z'Frankfurt gsi. Zerst het er im Underähme vum Vadder gschafft, dann aber het er sich dr Molerei zuegwendet, wo er z'Paris studiert un usgüebt het.

Anno 1847 het er si Dätigkeitsfeld uf d'Astronomi verlegt un am Pariser Observatorium zwische 1852 un 1861 vierzehn Asteroide vu öppe 70 bis 280 km Grössi entdeckt.
Demit het er as dr "Rekordhalder" dr Astronom John Russel Hind abglöst (10 Asteroide vu 1847-1854). Nooch ihm het's dr Robert Luther uf 24 Stuck (1852-1890), dr Amerikaner C.H.F. Peters uf 48 (1861-1889) un dr Östriicher Johann Palisa uf 123 Asteroide (1874-1923) brocht.

Dr wohl interessantist vu im Goldschmidt sine Asteroide isch glichzitig si chleinste - Nr. (44) Nysa vu 1857. D'Nysa isch fer ihr Grössi vu 70 km uffallend hell (Albedo 0,55) un besitzt e gälichi Färbig, wo mer im Mineral Enstatit zueschribt. Dur die schibeartig, in 6½ Stunde rotierend Form vum Himmelskörper entstoht e seltsami Liechtkurve, wie si bis dozuemols erst an eim andere Chleinplanet festgstellt worre isch.

Im April 1861 het dr Hermann Goldschmidt d'Entdeckig vume nünte Mond vum Saturn veröffetlicht, vu dem er e Bahn zwischem Titan un em Hyperion agä het, un het ihn Chiron daift. Doch isch d'Entdeckig nie vume andere Astronom bestätigt worre, weswäge dr Namme im 1977 entdeckte ugwöhnliche Asteroid (2060) Chiron zuegwise worre isch. Dr "offiziell" 9. Saturnmond Phoebe het 1898 dr William Henry Pickering uf photographischem Wäg entdeckt.

Fer sini Leistige isch dr Hermann Goldschmidt vu dr Akademi vu dr Wisseschafte uszeichnet worre un het 1861 d'Goldmedaille vu dr Royal Astronomical Society erhalde. Ferner sin dr (1614) Goldschmidt un e Erdmokrater nooch ihm benennt worre. Uf dr Pariser Gedenkmünze vu anno 1868, wo alässlich vum hundertste Asteroid prägt worre isch, isch er näbe drei andere Mehfachentdecker abbildet.

Literatur

Karl Christian Bruhns: Goldschmidt, Hermann. In: Allgemeine Deutsche Biographie (ADB). Band 9, Duncker & Humblot, Leipzig 1879, S. 338 f.

Weblink

Asteroide Nr.1-5000
Hypothetischi Planete (von The Nine Planets)

Dä Artikel basiert uff ere fräie Übersetzig vum Artikel „Hermann_Mayer_Salomon_Goldschmidt“ vu de dütsche Wikipedia. E Liste vu de Autore un Versione isch do z finde.