Hans Hug Kluber
| Dialäkt: Baseldütsch |
Dr Hans Hug Kluber (1535/6-1578) isch e Basler Mooler gsi.
Dr Kluber (odr Klauber) isch 1535/36 z Basel uf d Wält cho. Si Lehrzit het er vermuetlig bim Hans Asper z Züri absolviert. 1555 isch er dr Basler Moolerzumft «zum Himmel» biidräte. Dr Hans Bock dr Elteri isch 1570 bi ihm Gsell worde. Dr Kluber isch mit dr Barbara Haller verhürotet gsi. Am 2. Februar 1578 isch er z Basel an dr Pest gstorbe.
Zwar het me Beleeg für vili Ufdräg, aber vo siine Wärk isch nüm vil umewääg: Zeichnige noch eltere Meister (1548), zwei Bildniss (1552), eis vom Hans Rispach und eis vo dr Barbara Meyer zum Pfiil, e Portret vo dr Familie vom Basler Zumftmeister Hans Rudolf Faesch (1559, im Kunstmuseum Basel) und d "Geburt Christi" (1562, im Kunstmuseum Basel). Z Basel het dr Kluber immer wider öffentligi Wandmoolereie usgfüehrt. 1568 het er dr Dotedanz[1] an dr Predigerchille, wo Fragmänt drvo im Historische Museum Basel z gseh si, restauriert und es Portret vo sich und siiner Familie[2] und es Skelett im Stil vom Vesalius[3] drzue zeichnet. 1575 het er e Riterbild am Näbedoor vom Grossbasler Rhiidor gmoolt, wo nit erhalten isch.
Im Kluber si Wärk zeigt dr Iifluss vom Hans Holbei em Jüngere.
Literatur
ändere- Hans Hug Kluber. In: Ulrich Thieme, Felix Becker u. a.: Allgemeines Lexikon der Bildenden Künstler von der Antike bis zur Gegenwart. Band 20, E. A. Seemann, Leipzig 1927, S. 414
- Britta-R. Schwahn: Kl(a)uber (Gluber), Hans Hug(o). In: Neue Deutsche Biographie (NDB). Band 12, Duncker & Humblot, Berlin 1980, ISBN 3-428-00193-1, S. 130 f.
- Maria Becker: Kluber, Hans Hug. In: Historisches Lexikon vo dr Schwiiz.
- Maria Becker: Kluber, Hans Hug. In: Sikart (Lexikon un Datebank zue dr Chunscht in dr Schwyz un im Firschtetum Liechtestei).
Weblingg
ändere
Commons: Hans Hug Kluber – Sammlig vo Multimediadateie
