Hans Schneider (Schurnalischt)

Dr Hans Schneider (* 6. Novämber 1913 z Wyyl; † 23. Dezember 2002) isch e dytsche Schurnalischt un Autor gsii.

Lääbe

Dr Schneider stammt us ere Familie vu Buure un Handwäärcher. Är isch z Wyyl uf d Volksschuel gange un het no dr Schuel bim „Offizin“ C. W. Auer z Löörech Buechdrucker gleert.

Är het eerschti Briicht fir d Zytig gschribe un isch anne 1936 uf Fryburg zooge.

Z Baasel het er verschideni Kirs bsuecht un het fir di Basler Nationalzytig us em Badische brichtet. Är isch uf Berlin gange un het dert aafange an dr Rychsprässeschuel unterrichte. Bal het er aber gmerkt, ass em di bolitisch Richtig nit basst het un wäge däm isch er uf Barcelona gange un het dert wytergschribe fir di Basler Nationalzytig. Am Änd vum Zweete Wältchrieg isch er wider uf Fryburg chuu un het dert em nämlige Druckereizug zuegornet wore wie dr Verleger Heinrich Rombach. Noch em Chrieg het dr Rombach e Lizänz fir e neii Zytig iberchuu, di Badisch Zytig. Dr Schneider isch an dr Rotationsmaschine gstande, wu in dr Nacht zum 1. Februar 1946 di erscht Uusgab vu dr Badische druckt woren isch.

Fir di Badisch Zytig het er langi Johr vor allem iber di haimisch Wirtschaft un iber s Bruuchdum in dr Region gschribe. Är het au wider fir d Basler Nationalzytig gschribe us em Noochriegsdytschland, derzue au ab un zue fir d Züri-Zytig. Ab 1947 het er au fir dr Sidweschfunk gschafft un iber d Johr e Huffe Dialäktheerspiil, Radioseerine (z. B. „Der alemannische Landbote“ un „Auf ein Wort, Herr Nachbar“) un Glosse produziert. In Hunderte Dialäktheerspiil het er au sälber as Sprächer mitgwiirkt, e Dail het er au sälber gschriibe ghaa.

Unter em Pseudonym „Dengelegeischt“ het dr Hans Schneider ab 1976 in dr Badische Zytig all 14 Däg di alemannisch Kolumne „Landuff, landab“ gschribe. Di erscht Glosse vum 16. Jänner 1976 het aafgange mit „S isch wyder Mode worde, alemannisch z schwätze - landuff, landab. S git immer weniger Lütt, wo sich schäme im Dialäggt z rede.“ Im Septämber 1995 isch dr Schneider abglest wore vum Wunderfitz vom Wald.

Am 23. Dezämber 2002 het dr Schneider im Alter vu 89 Joor d Auge fir immer zuegmacht.

Uuszaichnige

• Hebeldank 1985
• Otto-Ernst-Sutter-Medaille vu dr Stadt Gengenbach 1987
• Silbrig Stadtsigel vu dr Stadt Fryburg 1988
• Verdienschtchryz am Band vum Verdienschtorde vu dr Bundesrepublik Dytschland 1994

Anne 2010 isch e Dail vum Retzbachwäg im Fryburger Stadtdail St. Jerge, wu dr Schneider langi Johr gwohnt ghaa het, in „Hans-Schneider-Weg“ umgnännt wore.

Weblink

• Uto R. Bonde: Mann der ersten Stunde bei der BZ, Badische Zeitung, 6. Novämber 2013