Hedy Hug-Rüegger

D Hedy Hug-Rüegger (* 13. Septämber 1901 im Kanton Züri; † 5. Meerz 1995 z Bärn) isch e Schwyzer Zaandokteri un langjeerigi Aktivischti fir Fraueräächt gsii.

Lääbe

D Hedy Rüegger isch am 3. Septämber 1901 im Züri-Ooberland uf d Wält chuu. Si het an dr Uniwersiteet Gämf, Züri un Baasel Zaanhailkund studiert un isch promowiert woore. Anne 1928 isch si uf Biel zooge un im Joor druf as eerschti Frau vu drStadt e Praxis unter irem Name ufgmacht. En schwääre Uufall het si 1962 zur Ufgaab vu irem Beruef zwunge. D Rüegger het dr Gwäärchschaftsschurnalischt Eugen Hug ghyroote ghaa.

D Hug-Rüegger isch au di eerscht Frau in dr Gsundhaitskummissioon vu dr Stadt Biel gsii. Si het deert d Bresidäntschaft vu dr Soziaaldemokraatische Frauegruppe ibernuu, wu 1924 noch ere zwaijeerige Paus widergrindet wooren isch. Die Gruppe het si bis 1932 im doomoolige «Volkshuus» un speeter im Café Frohsinn drofe. Si het Dischkussioone iber Waalräächt, Friiden un Abdryybig aagregt.

Aafangs het d Soziaaldemokraatene näb dr Mannebartei un dr buurgerlige Faue fascht nieme gaachtet. Des isch andersch woore im Spootjoor 1930 dur dr «Bieler Milchchrieg» geg dr Bärner Milchhändlerverband. D Hug-Rüegger un d Leereri Alice Boder-Lauper (1893–1978) sin d Sprächerne in eme joorelange Händel woore. Si hän zwelf Bieler Fraueorganisazioone us allne bolitisch Riichtige zue aire soorgfältig abgstimmte Kampagne chenne zämebringe. Im Jänner 1931 hän die di aige «Central-Molkerei AG» am Baanhofsblatz ufgmacht, wu d Huusliiferige wider ufgnuu het, wu im Wältchrieg yygstellt woore sin. En andere Erfolg isch dr Zämeschluss vu zee vu däne zwelf Fraueorganisazioone zum «Verband der Bieler Frauenvereine» im April 1932 gsii. E bsunder Broblääm isch gsii, ass si d Konsumgnosseschaft uf d Syte vu dr Milchhändler gstellt ghaa het.

Dernääbe isch d Hug-Rüegger au schwyzwyt un internazionaal fir Fraueräächt yydrätte. Mit em Schwyzerische Verband fir Frauestimmräächt (SVF/ASSF) het si langi Jorzeent fir d Frauestimmräächt in dr Schwyz gstritte. Anne 1929 het mer e Petizioon mit mit 249'237 Unterschrifte chenne ibergee. D Hug-Rüegger isch Viizebresidänti vu dr Bärner Sekzioon vum Stimmräächtsverband («Berner Frauenstimmrechtsverein/Verein Frau und Politik») gsii. S Frauewaalräächt isch aber eerscht anne 1968 uf kommunaaler Eebeni un 1971 uf Bundeseebeni yygfiert woore. Zur Fuurtbidlig het si di internazionaal feministisch Bräss un Stuudieräise bruucht, wu si 1931 mit em SVF/ASSF uf Änglang un im Joor druf mit em Verband vu dr Akadeemikerne (SVA/ASFU) in d Sowjetunion gfiert hän.

D Hug-Rüegger het d «Bieler Literaarisch Gsellschaft» (hite «Dilit») mitgrindet. Si isch anne 1954 Voorstands- un 1974 Eeremitgliid vu dr Bärnische Chunschtgsellschaft (BKG) woore. Si het Wäärch vu Mooler*ne un Bildhauer*ne us dr Regioon gsammlet.

Literatuur

• Charlotte Grup-Büchner: Hedy Hug-Rüegger. In: Annales biennoises. Biel 1995. S. 189.
• Béatrice Ziegler: Die Frauengruppe der SP Biel 1910–1930. In: Andreas Ernst, Erich Wigger (Hrsg.): Die Neue Schweiz? Eine Gesellschaft zwischen Integration und Polarisierung (1910–1930). Zürich 1996. S. 266–268.
• Gerda Stocker-Meyer: Tätiges Leben. Hedy Hug-Rüegger 75jährig. In: Der Bund. 26. September 1976.
• Die langjährige Kulturaktivistin Hedy Hug-Rüegger ist 90jährig. In: Der Bund. 23. September 1991.
• Franziska Rogger: Der Doktorhut im Besenschrank – das abenteuerliche Leben der ersten Studentinnen – am Beispiel der Universität Bern. eFeF, Bern 1999 und 2002. ISBN 3-905561-32-8.

Weblink

• Anne-Valérie Zuber: Hug-Rüegger, Hedy (1901–1995). In: Dictionnaire du Jura (DIJU).
• Anne-Valérie Zuber: Guerre du lait, Bienne (1930–1933). In: Dictionnaire du Jura (DIJU).

Fueßnote

Dä Artikel basiert uff ere fräie Übersetzig vu dere Version vum Artikel „Hedy_Hug-Rüegger“ vu de dütsche Wikipedia. E Liste vu de Autore un Versione isch do z finde.