Hirschesprung

De Hirschesprung isch e Klus zwüsched de politische Gmainde Oberriet und Rüthi i de Ostschwiz.

Hirschesprung

Geografii

Dor de Hirschesprung füert en Stroosseabschnitt vo de Kantonsstrooss 13. D Strooss verlauft vom Wiler Rehag i de Gmaind Oberriet, wo si de höchst Punkt hät, zwüsched de Felse i südliche Richtig zum Industriigebiet vo de Gmaind Rüthi abe. Uf de westliche Site vom Hirschesprung stigts gege de Brunneberg und witer zum Kamor a. Östlich vom Durchgang erstreckt sich de Blatteberg bis fast zum Rhii.

Gschicht

De Hirschesprung isch i früenere Johrhunderte a dere Stelle de ainzig Verbindigswäg uf de linke Site vom Rhii im Rhintl. Uf de östliche Site vom Blatteberg isch de Rhii mit sine Überschwemmige e Gfohr för di Raisende gsi. Erst d Korrektur vom Rhii am Aafang vom 20. Johrhundert hät de Bau vo de Isebahlinie und vo de Autobah A13 am andere Endi vom Blatteberg möglich gmacht. Dass de Hirschesprung scho früe e Bedütig gha hät, belait de Fund vonere neolithische Grabstätt.

De Hirschesprung isch langi Zyt au Sprochgränze zwüschem Alemannische und em Rätoromanische Gebiet gsi. Drum gits oberhalb vo Rüthi de Wiiler Plona, wo uf dia sprochliche Wurzle zrugg goht. No hüt macht sich dia Sprochbarriere i de unterschidliche Dialäkt vo de baide Gmainde südlich und nördlich vom Hirschesprung guet bemerkbar.

Wappe vo Rüthi

Varia

Im Wappe vo de politische Gmaind Rüthi isch de Hirschesprung sümbolisch abbilded. E Saag verzellt, as emol en Hirsch vo e paar Jäger verfolgt wore seg. Dor en muetige Sprung öber dia Schlucht heg er sich chönne vor de Jäger rette.

D Felswänd vom Hirschesprung werid regelmässig uf di möglich Gfoor vo Staischlag öberprüeft und sind i de Nacht mit Schiiwerfer uusglüüchded. Di ehemolig militärisch Stroossesperri isch zueteered worde.

Lueg au

• Hirschsprung

Weblink

 Commons: Hirschesprung – Sammlig vo Multimediadateie

• Markus Kaiser: Hirschensprung. In: Historisches Lexikon vo dr Schwiiz.

Fuessnoote

47.3038299.547724445