Hochzeitsnacht im Paradies

Dialäkt: Schwäbisch

Hochzeitsnacht im Paradies ischt a Operedde en acht Bilder vom Kombonischda Friedrich Schröder. S Libreddo hend dr Heinz Hentschke ond dr Günther Schwenn mitnander vorfasst. Uruffgfihrt worra isch des Werk am 24. Sebdember 1942, also midda em Zwoida Weltkriag, em Metropol-Theader z Berlin. Dui Vorstellong wuud zo so-ma graußa Erfolg, dass des Werk en Folge glei ibr 500-mol ibr d Bihne goht.

Firs Orkeschtr braucht-ma

A Fleet, viir Saxofon odr viir Klarinedda, drei Drombeeda, drei Posauna, a Klavier, a Harf, a Gidarr, a grauß Schlagwerk ond a Streicher-Grubbe (= erschde ond zwoide Violina, Bratscha, Tschellos ond Kontrabäss.

D Persona vo dr Handlong send

• d Regine (Sopran)
• dr Ulrich Hansen, ihr Moo (Tenor)
• d Veronika, dr Regine ihr Freindin (Subredde)
• dr Poldi Oberländer, a Sportreporder (Tenorbuffo)
• d Dona Dolores, a Tenzere, vo älle abr bloß Dodo gnannt (Subredde)
• dr Felix Wachtel, a Bombolesfabrikant (a Komiker, wo au a bissle senga koo)
• dr Dajos Lajos Földesy, dr Dodo ihr Impresario (Bassbuffo)
• dr Professor Fisch (Bariton)
• a Hodelportjee (Bariton)
• Drei Gondolieri (Teneer)
• dr Präsident vo-ma Tennisklub (Sprechroll)
• Diiner, Zofa, Schlosser, Boxer, Schiidsrichder, Publikum beim Boxkampf, Hochzeitsgäscht, Tenzerenna, Hodelgäscht, Hodelpersonal, Tennisspiiler ond Eiwohner vo Venedig (Stadischda, Tenzerenna ond Chor)

Ort, Zeit ond Titl vo de Bihna-Bilder

Dui Operedde spiilt en-ra net gnannda deitscha Großstadt ond en Venedig zo dera Zeit, wo des Werk zom erschda Mol ibr d Bihne ganga ischt, also so oms Johr 1942 rom.

Dia Macher vo deam Werk hend jedem vo selle acht Bilder an oigena Titl geaba:

• Bild 1: Mit harten Bandagen
• Bild 2: In letzter Minute
• Bild 3: Die Hochzeitsnacht
• Bild 4: Das gibt es nur im Paradies
• Bild 5: Paradies, Zimmer 51
• Bild 6: Kurzschluss im Paradies
• Bild 7: Vor den Arkaden
• Bild 8: Am Canale grande

Handlong

D Regine, a stolza Besitzere vo-ra Villa, stoht kurz vor dr Hochzeit mit-em Dr. Ulrich Hansen. Älle Gäscht hend sich scho en dr Empfangshalle vorsammlet ond wardet uff da Breidigam. Ondr de Wardende send au dr Regine ihr beschda Freindin Veronika ond dera ihr Vrlobder Poldi, dr Regine ihr Onkl Felix, a Bombolesfabrikant, ond deam sei Freind Dajos Lajos Földesy, dr Impresario vo dr berihmda Tänzere Dona Dolores, besser bekannt ondr-em Nama Dodo. De sell will mit äller Gwalt dui bevorstehenda Hochzeit vorhendra, weil se et eiseha will, dass dr Ulrich Hansen ausgerechnet ehra da Laufpass gäa hot. Scho daucht-se oo-eiglada mit a baar Kolleginna auf en dr Absicht, an Skandal zo vrursacha. Dr Onkl Felix ond dr Földesy merket glei, was selle Dama vorhend, ond locket-se ondra-ma Vorwand en da Keller ond sperret-se deet ei. Enzwischa ischt au dr Breidigam eitroffa, sodass sich de ganz Gsellschaft uff da Weag zom Standesamt macha koo.

Am Obad treffet dr Bombolesfabrikant ond dr Impresario en dr Regine ihrem Boudoir wiider uffanander. Do drbei erfehrt dr Földesy vo seim Freind, dass der a Aug uff dui rassiga Tenzere Dodo gworfa hot. S wär jetzt halt schee, wenn er als ihr Manager a bissle nochhelfa kennt. Beim Nausganga vorliirt dr Földesy dr Dodo ihr Zigaredda-Etui, wo wenich späder vo dr Regine gfonda wuud. Jetzt glaubt dui nadiirlich, ihr Uli hedd ausgerechnet am Hochzeitsdag mit seira Vorflossena a Techtlmechtl ghet. Zornich ziagt se sich ens Schlofzemmer zruck ond schliaßt sich ei, sodass ihr Moo nemme zo-ra komma koo. Do druff platzt deam dr Kraga. Mit-ra Wuat em Bauch goht’r us-em Haus ond miadet sich em Hotel «Paradies», wo de meischde vo seine Hochzeitsgäscht loschiiret, a Zemmer.

Zo späder Stond entstoht em «Paradies» a grauß Kuddlmuddl: D Veronika ondrhelt sich en ihrem Zemmer zemlich lautstark mit ihrem Vorlobda Poldi. Des abr brengt da Professor Fisch vom Zemmer neabaoo en Raasche. Beim Nausganga biddet dr Poldi sei Vroni, da Raum jo et abzoschliaßa, damit’r ehra em Notfall schnell zor Hilfe komma koo.

Enzwischa hot d Regine vo ihrer Zofe erfahra, was-es mit sellem Zigaredda-Etui datsächlich uff sich hot. Glei macht-se sich au auf zom «Paradies», om sich bei ihrem Moo zo entschuldiga. Deet trifft-se de meischde Hochzeitsgäscht en Feierlaune oo; ihr Moo abr ischt et drbei. Dr sell will sich grad en sei Zemmer zruckziha, betritt abr – alkoholisiirt ond lallend – vorsehentlich s Zemmer vo dr Veronika. Dui klärt-en rasch auf, wo-nr sich jetzt befendet. Do druff fangt dr Ulrich zom Jammra oo ond vorzehlt-ra vo seim Missgeschick mit seira Frau. Kaum hot’r dera ihrn Nama erwehnt, klopft’s au scho an dr Diir. Drussa stoht d Regine ond begehrt Eilass. En Windeseila schlupft d Veronika ondr d Beddlad. D Regine glaubt, se hedd s Zemmer vo ihrem Moo vorwischt, siht abr kurz drauf a Frauafiaßle hervorluaga, glaubt, des dät dr Dodo gheera, ond entschwendet mit-ma lauda Trara. Der Lärm ruaft da Poldi herbei. Wia dr sell da Hansen em Zemmer vo seira Braut entdeckt, kommet-em Zweifl an dera ihrer Treie.

En dr Hotelhalle trifft dr Ulrich wiider uff sei Frau ond will-se ibr älle Missvorstendnis uffklära. Zo ällem Ibrfluss erscheint abr grad en deam Moment dui Dodo uff dr Bildfleche ond duat grad so, wia wenn ihr Vorheltnis mit-em Ulrich wiider em Lot wär. Jetzt spiirt dr Ulrich, dass d Luft aus seira Ehe raus ischt ond entschliaßt sich, dui geplanda Hochzeitsreise noch Venedig alloi oozotredda. Weil-en d Veronika om sein Schutz biddet, därf dui mit-em reisa.

D Veronika hot vo Venedig aus ihrn Vorlobda mit-ma Telegramm uffgfordret, herzokomma. S dauret et lang, ond dr sell trifft mit dr Dodo ond em Bombolesfabrikanda seim Gefolge en dr Lagunastadt ei. Deet kommt’s bald druff zo dr allgemeina Vorsehnong. Am Schluss vo dr Operedde geit’s drei glickliche Pärla: d Regine ond dr Ulrich, d Veronika ond dr Poldi sowia dui Dodo ond dr Földesy.

Musikalische Heheponkt

Bsonders eigängig send dr Langsame Walzer So stell ich mir die Liebe vor, dr Paso Doble Dodo ist eine Frau, die jeder kennt, dr Walzer Ich glaube an dich und deine Liebe, dr Foxtrott Was ich dir noch sagen wollte, dr Langsame Walzer Alle Wege führen mich zu dir ond dr Foxtrott Ich spiel mit dir und du mit mir.

Vorfilmonga

• De erscht Vorfilmong stammt us-em Johr 1950 ond ischt en Schwarzweiß. Reschisseer isch dr Géza von Bolvary gwäa. D Hauptrolla werret en deam Film vom Johannes Heesters, dr Claude Farell ond vo dr Gretl Schörg gschbiilt.
• 1962 isch dui Operedde nei vorfilmt worra, ond zwar en Farbe. Desmol hot dr Paul Martin Reschii gfihrt. D Hauptrolla send mit-em Peter Alexander, dr Waltraud Haas ond dr Marika Rökk besetzt worra. Lueg do drzua da Ardikl „Hochzeitsnacht im Paradies (Film)“.
• En-ra Vorfilmong vom ZDF hot dr Alfred Walter Reschii gfihrt, ond d Hauptrolla hend dr Johannes Heesters, d Ingrid Karch ond d Ida Boros gschbiilt. Zom erschda Mol ausgschdrahlt worra isch der Stroifa am 4. Sebdember 1966.
• 1974 schliaßlich isch de viirt Vorfilmong entstanda, wiider vom ZDF. Reschisseer isch dr Thomas Engel gwäa. De mennlich Hauptroll hot scho wiider dr Johannes Heesters gschbiilt. Seine zwoi wichdigschde Partnerinna send d Karin Dor ond d Marlène Charell gwäa.

Litradur ond Quella

• Hellmuth Steger, Karl Howe: Operettenführer – Von Offenbach bis zum Musical, Fischer Bücherei Frankfurt am Main, November 1958, S. 149.
• Rolf Fath, Anton Würz: Reclams Opern- und Operettenführer, Philipp Reclam jun., Stuttgart, (2004), ISBN 3-15-010513-7

Weblink

• Hochzeitsnacht im Paradies em Operetten-Lexikon.info
• A Beschreibong vom Werk bei Felix-Bloch-Erben