Horus

Dr Gott Horus mit dr Dobbelchrone vo Ober- und Underägypte

Dr Horus isch ä Gott us dr altägyptische Mythologii. Är het s ägyptische Königtum symbolisiert und alli Pharaone hai sich as si Nochfolger gseh. Si Name isch in Hieroglyphe as ä Falk (MdC Umschriibig Hr.w), im Altägyptische au und in Sargteggscht mänggisch gschriibe worde.

Horus-götter

In Ägypte wird jedi Gschicht in ä baar verschiidene Versione verzellt. So wird in einere Dradition dr Horus as dr Brueder vom Osiris und Seth agluegt und es wird ihm dr Name dr Älteri Horus (griechisch: Haroeris) gä; in erä andere isch er dr Sohn vom Osiris. D Grieche hai em denn Harsiese, Horus-Sohn vo dr Isis, gsait und er isch noch em Dod vom Osiris im Nildelta im enä Verschdeck vo siiner Mueter Isis ufzoge worde, bis er sich am Mörder vo siim Vater, em Seth, het chönne räche.

Herrscher vo Ägypte

Siit de früehschte hischdorische Ziite isch dr Horus d Verkörperig vom ägyptische Königdum gsi. In dr Mythologii hai noch em Dod vom Osiris dr Seth und dr Horus d Herrschaft über s Land beaschbrucht. Im Kampf zwüsche beide het dr Horus es Aug verlore und s Land isch deilt worde. In Oberägypte het dr Seth gregiert und in Underägypte dr Horus. Noch andere Mythe isch dr Horus dr Herrscher über ganz Ägypte gsi und im Seth si d Wüeschdegebiet und s Uusland Untertan gsi.

Dr Horus Semataui (griechisch Harsomtus) isch dr Sohn vo dr Göttin Hathor (ihre Name bedütet „Huus vom Horus“) gsi. Semataui bedütet „Vereiniger vo de zwei Länder“, was a Zuename vo de Pharaone worden isch.

Quelle

• Manfred Lurker, Lexikon der Götter und Symbole der alten Ägypter, Scherz 1998, S.101f.

Weblingg

 Commons: Horus – Sammlig vo Multimediadateie