Hubert Deuringer
| Dialäkt: Schwäbisch |
Dr Hubert Deuringer (* 18. Januar 1924 z Empfenga[1], wo-nr am 16. Juni 2014 au gschdorba ischt) ischt a viilseidiger deitscher Musiker (Kombonischt, Arrangeur, Musikpädagog ond Kabell-Moischtr) gwäa, wo vo viile Leit als Mr. Akkordeon bezoichnet wôrra ischt.
Aus seim Leaba
ändereDr Hubert Deuringer kommt am 18. Januar 1924 em hohenzollerischa Empfenga am eschtlicha Rand vom Schwarzwald uff d Welt. Sei Vadder isch dr Flaschnermoischtr Josef Deuringer. Zonägscht bsuecht der Bua d Volksschuel en seim Hoimetort. Dass der Kerle au hochmusikalisch ischt, fellt seine Lehrer en dera Schuel glei auf. Zerscht lernt’r Klaviir-Schbiila, nô Klarinedd ond hendrher noh Akkordeoo. Obadrei kô-nr au noh prima Senga. Drom wondret’s au neamert, dass’r en seim Abschlusszeignis em Musik-Ondrricht a sehr gut kriagt. Aus deam Grond geit au em Hubert sei Musiklehrer em alda Deuringer da Rôt, sein Soh nôch Stuegert uff d Musikhochschuel zo schicka. So wuud’s au gmachet; der jonge Môô schbiilt mit Erfolg ama Professr vor. Wia nô abr em Hubert seine Eltra erfahret, was des Studiom koschda soll, machet se glei an Rickziher, weil-se so viil Geld et uffbrenga kennet. Jetzt nemmt dr Josef Deuringer sein Soh zo sich selber en d Lehr: nô soll’r halt au Flaschner werra ond schbätr amôl dui Flaschnerei ibrnemma. S dauret abr et lang, bis sich rausstellt, dass dr Hubert handwerklich vellich oobegabt ischt. Drom bricht’r dui Lehr au bald ab.
Schliaßlich ischt em Hubert Deuringer s Glick mit-em Musikstudiom doch noh hold: D Firma Hohner en Trossenga suacht fir ihr neis Konservadoriom jonge Leit mit-ra graußa musikalischa Begabong. En dr Ôfangszeit isch des Studiom sogar koschdalos. Dr Deuringer bewirbt sich ond wuud gnomma.
Glei nôch-em Kriag fangt fir da Deuringer sei graußa musikalischa Karriere ôô: 1945 wuud’r Akkordeonischt beim Radio Stuttgart[2]. Zwoi Jôhr druff wechslet’r zom nei grendeda Sidweschtfunk (SWF) nôch Bada-Bada ond wiider a Jôhr schbäder wuud’r dr Chef vom SWF seim Danz-Orkeschtr. En de 1950er ond 60er Jôhr kô mr dean Môô e-ma Haufa Fernsehsendonga als Solischt ond Kabellmoischtr seha. Drneaba iabt’r au noh an Lehrauftrag zor Ausbildong vo Akkordeon-Solischda en Stilistik, Harmonii-Lehr ond Improvisazioo am Hohner-Konservadorium z Trossenga aus. 1959 heiradet dr Deuringer sei Ursula. Em Lauf dr Zeit werret selle zwoi d Eltra vo drei Kendr.
Em hoha Alder erkrankt dr Hubert Deuringer noh an Krebs, wo-nr sich nemme drvoo erhola kôô. Am 16. Juni 2014 schließt’r en seim Geburts- ond Hoimetort seine Auga fir emmer. Emmerhin ischt’s-em vorgennt gwäa, 90 Jôhr alt zo werra.
Ehronga ond Nôchwirkonga
ändereFir seine Vordenscht om d Volksmusik isch dr Hubert Deuringer 1964 mit dr Hermann-Schittenhelm-Medaille auszoichnet wôrra. Benannt isch der Preis nôch-em Grender vom erschda Harmonika-Orkeschtr 1927. Nôch-em Deuringer seim Ableaba hôt-em sei Hoimetgmoind en ihrem Hoimetmuseom an oigena Raum gwidmet, wo vorschiidene Ausstellongs-Stickla Auskunft ibr sei Lebenswerk geabet.[3]
A Auswahl vo seine Werk
ändere- Die Lieder der Deutschen, a Buach mit 765 Volksliader en zeitgemäße Sätz uff 806 Seida.
- Das besondere Liederbuch
- Vortononga vom Sebastian Blau seine Gedicht[4]
- Dr Gsangverei’
- Dr Schereschleifer
- D Bürgerwach
- De’scht älles dei’
- En dr guade alde Zeit
- St. Nepomuk
- Dr Schäfer
- D Nähre
- Beim Feldkreuz
- Dr Karle Hank
- Zigeuner
- Schwäbische Sprüch
- Gaigel
- D Stuegeter
- Dr Landstreicher
- Feierobed
Quella
ändereFuaßnoda
ändere- ↑ Dui Gmoind leit em heidiga Landkreis Freidastadt
- ↑ Schbädr ombenannt en Süddeutscher Rundfunk, 1998 vorschmolza mit-em Südwestfunk (SWF) zom Südwestrundfunk (SWR)
- ↑ Des Hubert-Deuringer-Musik-Archiv hôt der Môô selber eigrichdet ghet, wo nôch seim Dod en da Besitz vo dr Gmoind ibrganga ischt.
- ↑ Dia Gedicht send älle uff Schallpladd uffgnomma wôrra: Die schwäbischen Gesänge des Sebastian Blau, interprediirt vom Willy Seiler, vom Albmädles Terzett”, vom Albert Hofele mit de Raudaburger Strôßasenger, de Achalmmusikanda ond de Schbennstubamusikanda. MPS 14.124