Hugo Schuchardt

Der Hugo Schuchardt, wo am 4. Februar 1842 z Gotha uf d Wält cho und am 21. April 1927 z Graz gstorben isch, isch e düütsch-öschtrychische Romanischt gsi.

Er het z Jena un Bonn Filology studiert und 1864 mit der Arbet De sermonis Romani plebei vocalibus s Dokterexame gmacht. Die Schrift isch es paar Joor spöter uf düütsch mit em Titel Der Vokalismus des Vulgärlateins im Truk usecho. Der Schuchardt het es Wyli i der Wälschschwiiz gläbt, anne 1870 het er sech a der Uni z Leipzig mit eren Undersuechig über s Bünderromanische habilitiert. Er isch de 1873 z Halle Profässer woorde und isch 1876 a d Uni Graz. Er het die romanische Sprooche, s Baskische und verschideni Mischsproochen erforscht.

Em Schuchardt syni Arbet isch öppis Wichtigs gsi zum besser verstoo, wie usem Volchslatyn die romanische Sprooche usecho sind. Er het dänkt, me müess bsunders d Gschicht vo de Wörter aluege, wemme wott wüsse, wie das mit der Sproochentwicklig ggangen isch. Un derby töörff me nit vergässe, ass d Wörter und d Sache zämeghööre. Und so isch sys Würke für en Afang vo der Dialäktology und vo der Sproochgeografy zu synere Zyt ganz wärtvoll gsi.

Er het mit vil anderne Sproochforscher z tue gha, i der Schwiiz öppe mit em Louis Gauchat und em Jakob Jud.

es paar vo syne Wäärch

Der Vokalismus des Vulgärlateins, 1866–1868
Kreolische Studien, 1882–1891
Über die Lautgesetze. Gegen die Junggrammatiker, 1885
Romanische Etymologien, 1898, 1899
Sprachursprung, 1919, 1920

Literatur

Leo Spitzer: Hugo Schuchardt Brevier. Ein Vademecum der allgemeinen Sprachwissenschaft; Festschrift: als Festgabe zum 80. Geburtstag des Meisters zusammengestellt, 1922
Bernhard Hurch: Schuchardt, Hugo Ernst Mario. In: Neue Deutsche Biographie (NDB). Band 23, Duncker & Humblot, Berlin 2007, ISBN 978-3-428-11204-3, S. 623 f.
Jürgen Storost, Hugo Schuchardt. In: Jürgen Storost: 300 Jahre romanische Sprachen und Literaturen an der Berliner Akademie der Wissenschaften, Frankfurt a. M.: Lang, 2000, Teil 1, S. 300–308.
Jürgen Storost: Hugo Schuchardt und die Gründungsphase der Diezstiftung. Stimmen in Briefen, Bonn: Romanistischer Verlag,1992.
Bernhard Hurch: Hugo Schuchardt. in: Karl Acham (Hg.): Kunst und Geisteswissenschaften aus Graz. Werk und Wirken überregional bedeutsamer Künstler und Gelehrter vom 15. Jahrhundert bis zur Jahrtausendwende. Böhlau Verlag, Wien-Köln-Weimar 2009 ISBN 978-3-205-77706-9 S. 493–510