Dialäkt: Baseldütsch

Dr Isaak Bowe (* öbbe 16. April 1615 z Brätzwil, † 28. Februar 1683 z Reigetschwiil) isch äine vo de Aafüerer vo de Baaselbieter Buure im Schwizer Buurechrieg gsi.

Biografii ändere

Dr Bowe isch as Soon vom Hans Bowe und dr Veronika Schärer 1615 z Brätzwil uf d Wält cho. Er isch e Buur und Müller gsi und isch mit dr Margreth Weber us Brätzwil verhürootet gsi.

In dr Zit vor em Usbruch vom Buurechrieg im Joor 1653 het er vilmol Versammlige vo de Baaselbieter gläitet und isch as Redner uusegstande. Bi de Verhandlige mit dr stedtische Obrikäit und an de groosse Landsgmäinde z Sumiswald und z Huttwil het er d Baaselbieter Underdaane verdräte. Er het hinder vile Beschwärde und Bittschrifte an d Obrigkäit gsteggt: Von iim stamme zum Bischbil d Chlaage vo dr Vogtei Ramstäi in dr Bittschrift vom 30. Merz 1653, dr erst Däil vo dr Supplikazioon vom 9. Mai 1653, won er din begründet, wiso si sich em Buurebund aagschlosse häi, und d Underwärfigserklärig vom Amt Ramstäi, , wo dr Ufstand zämmegschlaage gsi isch. Dr Bowe het d Inträsse vo de Buure ooni Gwalt welle duuresetze, im Raame vom Bruuchdum wo bestande het uf em Land und wo legitimi Wiise vom Widerstand anerkennt het.

Wääred anderi Baaselbieter Aafüerer wie dr Uli Schad noch dr Ändi vom Ufstand vo dr stedtische Obrigkäit festgnoo und umbrocht worde si, isch dr Bowe am 9. Juni 1653 über s Soledurnische dr Rhii uf uf Schaffuuse gflüchdet und vo dört gege Norde uf Nördlinge und Eberbach am Neckar, 30 Kilometer vo Häidelbärg äwäg. Im Februar 1654 isch er zruggchoo und het sich dr Baasler Obrigkäit übergää, und die het en e baar mol verhöört. Im Herbst 1654 het si en freigloo, aber en für eerlos und weerloos erkläärt und en in sim Woonort iibannt. Im Vergliich zu wie d Buurefüerer grad noch em Ufstand bestrooft worde si, isch das seer mild gsi. Zää Joor spööter isch er denn ändgültig begnadigt worde.

Kwelle ändere

Niklaus Landolt: Bowe, Isaak. In: Historisches Lexikon vo dr Schwiiz.