Isabelle von Siebenthal

Dialäkt: Undermarkgreflerisch

D Isabelle von Siebenthal (* 4. Oktober 1957 z Saane/Gstaad) isch e Schwyzer Schauspiileri un Dänzeri.

Lääbe

D Isabelle von Siebenthal isch zwoosprochig (Dytsch un Franzeesisch) z Gstaad ufgwagse. Mit zwelf Johr het si ire eerscht Ballettunterriicht iiberchuu. Anne 1972 het si mit eme Stipändium e aijehrigi Ballettuusbildig z New York chenne mache un het iri Uusbildig zur Ballettdänzeri z Monaco un Gämf bis 1979 wytergmacht.

Si het Engaschmänt as Dänzeri bim Opereballett Monaco ghaa, vu 1980 bis 1981 am Stadttheater Lozärn un 1982 bi dr Breagazer Feschtspiil. Vu 1982 bis 1985 het si Schauspiilschuel vu dr Victorine Studios un bim Studio Art Set z Nizza e Schauspiiluusbildig gmacht. Derno het si Engaschmänt as Schauspiileri bim Musiktheater vu dr Orcheschtergsellschaft Biel ghaa (1985/86 d Chava im Musical Anatevka vum Bock), 1986 bis 1988 am Stadttheater Lozärn (unter anderem d Poppy Norton-Taylor in Der nackte Wahnsinn vum Michael Frayn un d Martha Bessel in Frühlings Erwachen vum Frank Wedekind) un vu 1988 bis 1990 am Städtebundtheater Biel-Soledurn, wu si unter anderem d Luise in s Schillers Kabale und Liebe, d Amine in s Goethes Die Laune des Verliebten, d Polly in Die Dreigroschenoper vu Bertolt Brecht/Kurt Weill, d Johanna in Trilogie des Wiedersehens vum Botho Strauß, d Barblin in Andorra vum Max Frisch un d Franziska in s Lessings Minna von Barnhelm gspiilt het.

Derno het si as freii Schauspiileri gschafft, unter anderem z Hamburg am Theater Das Schiff, am Ernst-Deutsch-Theater (unter anderem Marianne in Der Raub der Sabinerinnen vu dr Brieder Franz un Paul von Schönthan, wider d Poppy in Der nackte Wahnsinn un d Wally in Die spanische Fliege vu Arnold/Bach) un am Theater im Zimmer (unter anderem 1993 d Florence in Die Falle vum Robert Thomas) un z Hannover an dr Landesbühne (1992 d Titelroll in s Ibsens Nora oder Ein Puppenheim).

Ab 1994 het d Isabelle von Siebenthal in dr Hauptsach fir s Fäärnseh gschafft. In dr Schwyz chännt mer si vor allem dur d Hauptroll vu dr Catherine Lüthi-Blanc in dr Soap Lüthi & Blanc vum Schyzer Fäärnseh DRS (1999 bis 2006). Dernääbe het si in verschiidene dytsche Fäärnsehserie mitgspiilt, unter anderem in Für alle Fälle Stefanie, Dr. Stefan Frank – Der Arzt, dem die Frauen vertrauen, Großstadtrevier, Die Wache, Liebling Kreuzberg, Die Honigfalle, Tessa – Leben für die Liebe un Sturm der Liebe.

Anne 2004 het si dr Schauspiiler Hans Schenker ghyroote, wu si bi dr Aarbete zue dr Familieserie Lüthi und Blanc chänneglehrt ghaa het. Zäme mit em Schenker het si au an verschiidene Schwyzer Theatre gspiilt, unter anderem in Harmony vu Katja Früh/Patrick Frey (2001–2003, Premiere am Theater am Hechtplatz z Züri, Reschy: Katja Früh) un in Zimmerschlacht vum Martin Walser (ab 2004, Premiere am Theater am Käfigturm z Bärn, Dialäktibersetzig un Reschy: Hans Schenker).

E baar Johr lang hän d von Siebenthal un dr Schenker Reschtaurant Wildhorn z Louene gfiert.

Anne 2017 sin si zäme uf Nizza zooge.

Uusglääseni Filmografy

• 1996: Dr. Stefan Frank – Der Arzt, dem die Frauen vertrauen
• 1999–2006: Lüthi und Blanc (Fäärnsehserie)
• 2005–2006: Tessa – Leben für die Liebe (Fäärnsehserie)
• 2005–2008: Die Rosenheim-Cops (Fäärnsehserie, 2 Folge)
• 2007–2008: Sturm der Liebe (Fäärnsehserie)
• 2018: WaPo Bodensee (Fäärnsehserie, Folg Abgerutscht)

Literatur

• Tanja Stenzl: Isabelle von Siebenthal. In: Andreas Kotte (Hrsg.): Theaterlexikon der Schweiz. Band 3. Chronos, Zürich 2005, ISBN 3-0340-0715-9, S. 1684.

Weblinks

• Offiziälli Websyte vu dr Isabelle von Siebenthal un em Hans Schenker
• d Isabelle von Siebenthal uf castforward.de
• Isabelle von Siebenthal in dr Internet Movie Database