Johann Dähler
Dr Johann Dähler isch en Puur vo Fruthwile, Thurgau gsi. Dr Dähler isch bekannt dafür dass är in dr Elfebeiküschte emol dr gröscht Ananasproduzänt gsi isch. Är isch oft au Ananaskönig gnennt worde.
Dr Johann Dähler isch inere Buurefamilie ufgwachse, und het vier Brüedere und fünf Schwöschtere ka.[1] Er het dr elterlichi Hof, der Eggishof zämme mit sine Brüedere übernoh, was nit grad traditionell gsi isch.[1] Im Joor 1973, het dr Johann Dähler sich in Zentralafrika niedergloo und dört dr Bevölkerig gholfe, Tomate uffzieh.[2] D’Landwirtschaftsschuel, wo er in dr Schwiz bsuecht het, het dört es Tomateaabauprojäkt unterstützt.[2] Nachdem im Joor 1977 dr Bokassa sich zum Kaiser vo Zentralafrika krönt het, isch d’Finanzierig vom Tomateprojäkt nümme gwährleischtet gsi und er het sich entschlosse nach Costa Rica in Zentralamerika z’reise. Sis Schiff het aber in Abidjan, dr Hauptstadt vo dr Elfebäiküschte aaglegt und dört isch em denn kurz langwiilig worde.[2] No het er Arbet gsuecht, bimene Ananasproduzänt vo Norwege e stell beko und isch bald bis zum Gschäftsführer ufgstiige.[2] Bald het er au sini eigeni Plantage kauft. Im 1979 het er zämme mit sine Brüedere e Firma gründet mit welere Ananas in d’Schwiz exportiert het.[3] An dr Elfebäiküschte het dr Johann Dähler zwüschezytlich en Ananasplantage vo um die 2000 Hektare Land und mit 1500 Aagstellte gfüehrt.[3] Für bis zu 50% vom Ananasimport vo dr Schwiz isch er ufkoh und s Bundesamt für Ussewirtschaft (Seco) het dr Johann Dähler als es Bispil für e glungeni Entwickligshilf aagfüehrt.[4] Kurz vor 2000 isches denn aber mit em Ananaspriis aabegange, und er het sy Ananasfarm müesse uffgäh.[2]
Im 2000 isch er mit dr Familie, also de vier Kinder und sinere Ehefrau zrugg ind Schwyz ko, wo sini Kinder d’Schuel bsuecht hän.[5] Im 2003 het er in Costa Rica 380 Hektare land kauft, wo er wieder Ananas aapflanzt het.[5] Do drby isch er finanziell vom Fredy Hiestand vo Bade unterstützt worde.[4] Im 2009 hän den sini 3 Söhn d’Leitig vom Betrieb übernoh.[5] D’Dählers bsitze unterdesse 780 Hektare in Costa Rica vo wellne 480 für d’Ananasproduktion bstimmt sind.[5]
Im 2010 isch dr Johann Dähler wieder ind Elfebäiküschte zrugg, wo är in Tiassalé wohlwollend empfange worde isch.[6] Es Joor druff, isch er zum Ehrebürger vo Tiassalé ernennt worde.[6] Im 2012 het dr Johann Dähler denn 470 Hektare um Tiassalé wieder könne zruggkaufe.[4] 100 Hektare het der Dähler em Fredy Hiestand überloh, wo druf au wot Cacao für sini Schoggigipfeli kultiviere.[4] Dr Johann Dähler isch es paar Joor in Weschtafrika bliibe, und het Kautschukbäum kultiviert.[6] En Herzinfarkt het en wieder in de Schwiz gfüehrt wo er es bessers Klima erwartet het.[6] Im September 2023 isch dr Johann Dähler im Inselspital in Bern gstorbe.[3]
Äinzelnoochwiis
ändere- ↑ 1,0 1,1 Dähler Früchte. Dähler Früchte, abgruefen am 15. September 2023.
- ↑ 2,0 2,1 2,2 2,3 2,4 Johann Dähler, der Ananaskönig. In: Swissonline. 12. Januar 2008, abgruefen am 15. September 2023.
- ↑ 3,0 3,1 3,2 Der Ananaskönig ist tot: Das wilde Leben von Jonas Dähler. SRF, 1. Juni 2013, abgruefen am 15. September 2023.
- ↑ 4,0 4,1 4,2 4,3 Sophie Rüesch: Gipfelikönig Hiestand spannt in Afrika mit Ananaskönig Dähler zusammen. In: Badener Tagblatt. 28. März 2014, abgruefen am 15. September 2023.
- ↑ 5,0 5,1 5,2 5,3 Yvonne Aldrovandi: Jetzt führen die Söhne von Ananaskönig Dähler das Geschäft. In: St. Galler Tagblatt. 21. Februar 2018, abgruefen am 15. September 2023.
- ↑ 6,0 6,1 6,2 6,3 Brigitta Hochuli: Dähler zurück in Afrika. In: St.Galler Tagblatt. 8. Oktober 2023, abgruefen am 15. September 2023.