Johann Philipp Glock

Dr Johann Philipp Glock (* 10. Dezämber 1849 z Schriesheim; † 14. Dezämber 1925 z Bad Nauheim) isch e badische Pfaarer un Haimetforscher gsii.

Lääbe

Dr Johann Philipp Glock isch as Suhn vum Lehrer Philipp Jakob Glock un däm sy Frau Charlotte im Schriesheimer Schuelhuus uf d Wält chuu. Em Glock sy Vater het bi dr Badische Revolution 1848/49 mitgmacht un isch vor Gricht chuu, isch baer freigsproche wore. Dr Glock isch uf s Gimnasium z Haidelberch ganmge un het noch em Abitur an dr Uniwersideet Erlangen aafange evangelischi Theology studiere. Sy eerschti Stell as Vikar het er an dr Hailiggaischtchilche z Haidelberch kriegt. As Sanideeter un speetere Militeergaischtlig isch er bim Dytsch-Franzeesische Chrieg 1870/71 derby gsii. Dernio het er Vikarstelle z Lohr, z Ämmedinge un z Baade-Baade ghaa. Drotz ass er z Baade-Baade hätt chenne Pfaarer gee, het er liber d Bfaarstell z Zuzenhausen aagnuu. Deert isch dno vu 1877 bis 1896 Pfaarer vu dr evangelische Pfaargmai gsii. Dr Glock het welle ne Dorfpfaarer syy, wel er d Neechi zum aifache Volk gsuecht het.

Anne 1880 het er in dr Hailiggaischtchilche z Haidelberch d Marie Heß ghyrote. S Baar hetz eh Chinder kriegt, fimf Deechtere un fimf Sihn. Näbe sytre Arbet as Pfaarer het er in sym große Pfaargarte gartneret un het Imme ghalte. In Imkerzytige un Broschüre het er zue vyl Froge vu dr Immezucht gschribe. Dr Glock isch langi Johr Bezirkspflääger vu dr Historische Kommission fir s Großherzogtum Bade gsii. As Abschidsgschänk an Zuzenhausen het er e umfangrychi Ortschronik unter em Titel „Burg, Stadt und Dorf. Zuzenhausen im Elsenzgau – eine Ortsgeschichte“ publiziert.

Anne 1897 het dr Oberchilcherot dr Glock mit syre Zuestimmig uf Wolfewyler versetzt, wu s e Pfaarhuus mit 14 Chammere fir sy großi Familie gee het. D „Lieder und Sprüche aus dem Elsenztale“, wun er anne 1898 vereffetligt het, het er no z Zuzenhausen zämegstellt ghaa.

Au z Wolfewyler het er si mit em Bruuchdum bscheftigt un in sym „Breisgauer Volksspiegel“ e großi Sammlig vu Sprichwerter, Redensarte, Schwänk, Lieder un Bryych im alemannische Dialäkt us dr untere Vogteie vu dr Herrschaft Badewyler, vor allem us em Dorf Wolfewyler sälber, zämedrait. Där Volksspiegel isch di umfangrychscht Dokumäntation vum Alemannisch us em sidlige Brysgau us däre Zyt.

Wäge dr schwäre Chranket vu syre Frau het er si anne 1916 in Ruestand versetze loo un s Baar isch uf Bad Nauheim zoge. Dr Dod vu drei Sihn, wu im Erschte Wältchrieg gfalle, un dr Dod vun eme Suhn, wu uf Amerika uusgwanderet isch, hän em syni letschte Lääbesjohr verduschteret. Z Laudenbach het er anne 1925 syni letscht Ruestätt gfunde.

D Gmai Schallstadt hat no ihm d Johann-Philipp-Glock-Grund- un Hauptschuel mit Wärchrealschuel gnännt.

Wäärch

• Burg, Stadt und Dorf. Zuzenhausen im Elsenzgau – eine Ortsgeschichte. Selbstverlag, Wolfenweiler 1896. VIII, 240 S. Ill., Kt.
• Die Symbolik der Bienen und ihre Produkte in Sage, Dichtung, Kultus, Kunst und Bräuchen der Völker. Weißsche Universitätsbuchhandlung, Heidelberg 1891 (2. Uflag 1897)
• Lieder und Sprüche aus dem Elsenztal. In: Alemannia. 25. Jahrgang (1898), S. 193–255 Commons
• Die preussischen Werber im „Leimstollen“ zu Leutersberg. Alemannia. 36. Jahrgang (1908), S. 81–90 Commons
• Breisgauer Volksspiegel. Eine Sammlung volkstümlicher Sprichwörter, Redensarten, Schwänke, Lieder und Bräuche in oberalemannischer Mundart. Ein Beitrag zur badischen Volkskunde für jedermann. Moritz Schauenburg, Lahr 1909
• Badischer Liederhort. Eine Sammlung der bekanntesten und schönsten Volkslieder der badischen Heimat ... Bd. I, 1910
• Es war einmal. Ein Kameruner Immortellenkranz deutscher Koloniallieder. Den Toten zum Gedächtnis, den Lebenden zur Erinnerung, den kommenden Geschlechtern zum Vorbild. Aus deutscher Brust gesungen. Gewidmet von einem alten Kolonialfreund 1922.

Literatur

• Stüssi, Anna: Glock, Johann Philipp. Deutsches Literatur-Lexikon. Band 6 (Gaa – Gysin). De Gruyter, Berlin, Boston 1978. ISBN 978-3-907820-06-32017. (Online)
• bsch: „Bauernpfarrer“ Johann Philipp Glock, in: Rhein-Neckar-Zeitung vom 9. Februar 1984.

Weblink

 Johann Philipp Glock im dütschsprochige Wikisource

• Glock, Johann Philipp uf LEO-BW

Dä Artikel basiert uff ere fräie Übersetzig vu dere Version vum Artikel „Johann_Philipp_Glock“ vu de dütsche Wikipedia. E Liste vu de Autore un Versione isch do z finde.