Faesch

Faesch isch dr Naame von ere Baasler Familie, wo mä bis ins früeje 15. Joorhundert cha zruggverfolge. Woorschinlig het si us em Brisgau gstammt, uf jeede Fall het d Familie 1409 s Baasler Bürgerrächt überchoo, het vo 1494 aa e Verdräter im stedtische Root gha und eso zur Oberschicht ghöört. Vo dr Middi vom 16. Joorhundert und bis zum Ändi vom 18. Joorhundert isch immer e Faesch in de oberste Stadtorgan verdräte gsi. D Familie isch 1563 vom Kaiser Ferdinand I. gaadlet worde.

S Wabbe vom Joseph Fesch as suveräne Fürst, französische Brinz und Kardinal.

Dialäkt: Baseldütsch

D Familie vom Baasler Zumftmäister Hans Rudolf Faesch und dr Anna Glaser (1559), Hans Hug Kluber, Kunstmuseum Basel.

Ass si so lang zur Baasler Elite ghöört het, het d Familie nid zlerscht ere gschiggte Hürootspolitik z verdanke ghaa. Wo dr Franz Faesch, en Offizier uf Korsika in genuesische Dienst, d Witwe Ramolino ghürootet het, si d Faeschs sogar mit dr Familie Bonaparte verschwöögeret gsi. D Dochder Laetizia vo dr Witwe Ramolino us iirer früenere Ee isch d Mueter vom Napoleon gsi, dr Soon Joseph Fesch (1763–1839) us iirer Ee mit em Franz Faesch im Napoleon si Unggle. Dr Joseph Fesch het e bedütendi Karriere gmacht. Er isch katholisch worde und denn Kardinal und Erzbischof vo Lyon. Er isch au no dr franzöösisch Botschafter z Rom gsi, Senator und Groof, isch 1806 in Rang vom ene suveräne Fürst erhoobe worde, isch 1807 franzöösische Brinz, 1815 Pair vo Frankriich und denn au no römische Brinz worde.

In dr Middi vom 17. Joorhundert si d Faeschs die riichsti Familie z Baasel gsi, iiri Familiestiftig, wo im 16. Joorhundert gründet worde isch, bestoot hüte immer no.

S Museum vo de Faesch

S «Museum Faesch», wo dr Jurist, Uniwersidäätsräkter und Kunstsammler Remigius Faesch (1595–1667) as e tüpischi Kunstkammere vom 17. Joorhundert aagläit het, het bis 1823 as Fideikommiss bestande; d Sammlig isch in Bsitz vo dr Uniwersidäät Baasel choo und isch wie vorhär scho s Amerbachkabinett e Kärnbestand vo de staatlige Baasler Museum worde.

Dr Kardinal Fesch het z Ajaccio uf Korsika e Kunstmuseum gründet, s Musée Fesch.

Anderi Familiemitgliider

• Remigius Faesch (um 1460–1533 oder 1534), e Baumäister vo dr Spätgotik
• Christoph Faesch (1611–1683), e Historiker
• Johannes Faesch (1779–1856), e Kaufmaa und Bürgerworthalter
• Jules Faesch (1833–1895), en Ääschenjöör
• Emil Faesch (1865–1915), en Architekt

Weblingg

• Samuel Schüpbach-Guggenbühl: Faesch In: Historisches Lexikon vo dr Schwiiz.