Joseph Liard

Dr Joseph Liard (* 17. Dezämber 1747 z Rosières-aux-Salines; † 21. April 1832 z Besançon) isch e französische Ingeniöör gsi. Sis grosse Wärch isch dr Rhy-Rhone-Kanaal.

Dr Liard isch dr Soon vome Architekt gsi. Er het a dr staatleche Ingeniöörschuel École des ponts et chaussées vo 1769 bis 1775 s Bouwääse gstudiert. Derno isch er i dr Bretagne als Ingeniöör agstellt gsi und het dört s Projäkt füre Kanaal vo La Vilaine uf La Rance plaanet und d Schifffahrt i dr Gägend vo Rennes gleitet. Wyteri Arbete het er am Kanaal vom Burgund und im Haafe vo Le Havre übernoo. Ane 1791 isch er Scheffingeniöör vo dr Baudiräkzion Ponts et Chaussées vom Departement Doubs worde. Do het er syni Läbensufgaab gfunde: dr gross Wasserwääg vom Rhy-Rhone-Kanaal z plaane und au z boue. 1804 isch dr Liard sälber dr Diräkter vom Kanaal worde. Unter sinere Leitig isch das grosse Wärch, wo in föif französischi Departemänt vom Rhy bis a d Soone lyt, bis ane 1832 fertig bout worde. 1812 isch er zum Generalinspäkter vom Bouwääse beförderet und frufabe i di französischi Eerelegioon ufgnoo worde. Ane 1832 isch dr Liard z Besançon gstorbe.

Dr Grabschtei vom Joseph Liard im Friidhof vo Besançon isch nach ere Zeichnig vom Liard sälber gmacht. Das Dänkmol zeigt uf zwöi Syte Chübel, wo druss die beide Flüss Rhy und Rhone flüsse, wie me a de Inschrifte gseht. Uff ere dritte Syte isch s Portaal vom Kanaaldunäll bi Thoraise, eme Schlüsselbouwärch vom ganze Kanaal, abbildet.

Weblink

• Joseph Liard uf structurae.info