Katharina von Salis

D Katharina von Salis Perch-Nielsen (* 26. Oktober 1940) isch e Schyzer Geologi, Orientierigslaiferi un Frauerächtleri. Si isch usserordeligi Brofässeri am Departement fir Ärdwisseschafte an dr ETH Züri gsii.

In dr Zyt vu ire wisseschaftlige Karriere as Brofässeri vu dr Mikropalänotologiy vum Geologischen Inschtitut an dr ETH det si si fir d Glychberächtigung vu dr Gschlächter in dr Wisseschaft engaschiert un isch seli aktiv im Kampf um d Position vu Maidli un Fraue in dr Wisseschaft an Schwyzer Hochschuele un in Gimnasie gsii.

Familei, Uusbildig un Beruef

As Dochter vu dr Schuernalischti Charlotte von Salis isch d Katharina von Salis z Zollikofe im Kanton Bärn ufgwagse. Si het Geology studiert an dr Universitet Bärn, wu si 1965 ihre Dokter in Geology un Sedimäntology gmacht het.

Si isch ghyrote mit em dänische Chemyingenieur Jørgen Perch-Nielsen un het drei Dechtere.

D von Salis het as Postdoc zerscht z Kopenhagen un no z Paris gschafft. Vu 1968 bis 1974 isch si Dozänti an dr Universitet Kopenhagen gsii. Zwische 1974 un 1989 het si mit ire Familie z Züri gläbt, derno z Amsterdam, z Wien, z Den Haag un z London, voreb si retuurchuu isch uf Züri. In däre Zyt het si unter anderem as Wisseschaftleri an dr Freie Universitet Amsterdam un em Naturhistorische Museum z Wien gschafft, aber au Biostratigrafikeri d Royal Dutch Shell beroote. Anne 1989 isch si Titular-Brofässeri an dr ETH Züri wore.

Am 1. Oktober 2001 isch si in Ruestand drätte.

Sportkarriere

An dr allereerschte Europäische Orientierigslauf-Maischterschaft 1962 isch si Segstblatzierti im Ainzelwettkampf gsii un hetmit em Schwyzer Team d Bronzemedaille in dr Stapfle gwunne.

An dr Europäische Orientierigslauf-Maischterschaft vu 1964 het si ne Silbermedaille in dr Stapfke gwunne un isch Zeeti im Ainzelwettkampf gsii.

An dr Orientierigslauf-Wältmaischterschaft vu 1966 z Fiskars het si ne Silbermedaille im Ainzelwettkampf gwunne un isch mi dr Schwyzer Stapfle uf em 4.Blatz glandet.

Im Langlauf het si e baar Schwyzer Maischtertitel gwunne. Si het si au im Chläätere versuecht, het aber dodol as Frau nit Mitglid vum Alpine Chlääterclub vz dr Universideet Bärn wäre.

Engaschmänt im Fraueräächt

Derwylscht si Brofässeri fir Mikropaläontology am Geologische Inschtitut an dr ETH Züri gsii isch, het si si seli engaschiert fir d Glyychberäächtigung vu dr Gschläächter in dr Wisseschaft un isch au aktiv gsii im Kampf um d Position vu Maidli un Fraue in dr Wisseschaft an Schwyzer Hochschuele un in Gimnasie. Si het fir d Frauenaalaufstell (hite: Equal! – Stelle für Chancengleichheit von Frau und Mann) engaschiert, wu an dr ETH Züri 1991 grindet woren isch, un het aktiv mitgmacht bim Ufböu vu sällere Stell.

D Fraue- un Glyychstelligsbeufdraiti vu dr Universideete un dr boode ETH hän si scho anne 1992 in dr KOFRAH (Konferenz der Frauen- und Gleichstellungsbeauftragten an Schweizer Universitäten und Hochschulen) organisiert, go ire Know-how daile un si gegesytig informiere un unterstitze. D Katharina von Salis het die Verainigung in dr Johr 1997 bis 2001 bresidiert.

Si het au derzue bydrait, ass d Bundesprogramm Chanceglyychhait Realideet wooren isch un dr Bund fir d Legislaturperiod vu 2000 bis 2003 Frauenfeerdergälder in dr Heechi vu 16 Millione Franke bschlosse het. No hite engaschiert si d von Salis fir d Glyychstellig im Bündnerland.

Bryys

D Katharina von Salis het anne 1998 d Steno Medaille fir ihri Arbet in dr Mikropaläontology z Dänemark un z Grönland un as Pionieri im Studium vu dr Coccolithe iberchuu. 2003 isch si Ehremitglid vu dr «International Nannoplankton Association» wore un 2007 het si dr Bryys vu dr Dr. Ida Somazzi-Stiftig fir ihre Wirke as Geologi un engaschierti Frauefeerderi an dr ETH un an dr Universideete iberchuu. 2008 het si d sie die „Brady Medaille“ kriegt fir ihri Bydreg in dr Fälder Biostratigrafy, Paläobiologiy un Nanofossilie.

Uusgläseni Publikatione

• Geologische und sedimentologische Untersuchungen in Molasse und Quartär südöstlich Wolhusen (1965)
• Der Feinbau und die Klassifikation der Coccolithen aus dem Maastrichtien von Dänemark (1968)
• Revision of Triassic stratigraphy of the Scoresby Land and Jameson Land region, East Greenland (1974)

Weblink

• UniFrauenstelle – Gleichstellung von Frau und Mann: Laudatio für Katharina von Salis. Universität Zürich., 22. Juli 2018, abgruefen am 22. April 2020.  (PDF)

Fueßnote

Dä Artikel basiert uff ere fräie Übersetzig vu dere Version vum Artikel „Katharina_von_Salis“ vu de dütsche Wikipedia. E Liste vu de Autore un Versione isch do z finde.