Kerstin Krieglstein

D Kerstin Krieglstein-Unsicker (* 23. Juuli 1963 z Erlangen) isch e dytschi Neurowisseschaftleri. Si isch syt em Oktoober 2020 Räkteri vu dr Uniwersiteet Fryyburg.

Lääbe

D Kerstin Krieglstein het noch eme voorzoogene Abituur anne 1981 an dr Elisabethschuel z Marburg vu 1982 bi 1984 Chemy an dr Uniwersiteet Marburg studiert, vu 1984 bis 1987 Farmazy an dr LMU Minche un vu 1988 bis 1990 Farmakology an dr Uniwersiteet Gießen. Anne 1990 isch si as Apeteekeri approbiert woore. Im nämlige Joor isch Krieglstein z Marburg mit ere Dissertazioon iber d Struktuur vu Tetanustoxiin un Botulinum A-Toxiin zur Dr. rer. nat. bromowiert woore. As Post-Doc het si vu 1990 bis 1992 an dr Fakulteet fir Molekulaarbiology un Biochemy vu dr University of California, Irvine, vu 1992 bis 1993 am Inschtitut fir Anatomy un Zällbiology vu dr Uniwersiteet Marburg un vu 1993 bis 1998 an dr Uniwersiteet Haidelberch gfoorscht. Anne 1997 het si d Krieglstein fir s Fach Anatomy un Zällbiology z Haidelberch habilitiert. 1998 bis 1999 isch si Heisenberg-Fellow (DFG) am Inschtitut fir Anatomy un Zällbiology vu dr Uniwersiteet Haidelberch gsii.

Im Joor 1999 isch d Kerstin Krieglstein as Brofässeri fir Anatomy an d Uniwersiteet vum Saarland gruefe woore. 2001 isch si uf e Brofässuur fir Neuroanatomy uf Göttingen gwägslt un isch deert Diräkteri vum Inschtitut fir Neuroanatomy vu dr Uniwersiteetsmediziin Göttingen woore. Anne 2007 isch si eme Ruef uf e Brofässuur fir Anatomy an d Albert-Ludwigs-Uniwersiteet Fryyburg noogange. 2009 isch si Diräkteri vu dr Abdailig fir Molekulaari Embryology woore. Anne 2010 isch si Proodekaani fir Struktuur, Foorschig un Entwicklig vu dr Mediziinische Fakulteet vu dr Uniwersiteet Fryyburg woore un 2011 isch si au no Kummissaarischi Laiteri vu dr Abdailig fir Neuroanatomy woore. Vu 2014 bis 2018 isch si Dekaani vu dr Mediziinische Fakulteet vu dr Uniwersiteet Fryyburg.

2007 isch si as Mitgliid in d Leopoldina ufgnuu woore, di eltscht natuurwisseschaftli-mediziinisch Gleertegsellschaft im dytschsproochige Ruum.

Iri Uusbildig umfasst d Farmazy un d Schnittstelle in di neurofysioloogisch, neuroanatoomisch un zällbioloogisch Foorschig. Iri Foorschigsschwäärpinkt sin Neurochemy, Neurofysiology, Neuroanatomy, Wagsduumsfaktoore, Zällbiolog vu dr Neuroone un Molekulaari Embryology.

Zum 1. Augschte 2018 het d Kerstin Krieglstein s Amt vu dr Räkteri vu dr Uniwersiteet Konschtanz ibernuu, as Noofolgeri vum Ulrich Rüdiger, wu Räkter an dr RWTH Aachen wooren isch.

Am 27. Mai 2020 isch si as eerschti Frau in dr Gschiicht vu drUniwersiteet Fryyburg zur Räkteri gweelt woore. Zum 1. Oktoober 2020 het si d Stell aadrätte. Syt Dezämber 2020 isch si Viizebresidänti fir Foorschig, wisseschaftlige Noowugs, Hoochschuelmediziin un Gsundhaitswisseschafte vu dr Hoochschuelräkterkumferänz.

Fir d CDU-Frakzioon Baade-Wiitebäärg isch si bi dr 17. Bundesversammlig am 13. Februar 2022 derbyy gsii.

Si isch ghyroote un het zwai Chinder.

Weblink

• Literatur vu un iber Kerstin Krieglstein im Katalog vu dr Dütsche Nazionalbibliothek
• Suech no "Kerstin Krieglstein" in dr Dytsche Digitale Bibliothek (DDB)
• Mitglidsyytrag vu Kerstin Krieglstein (mit Bild und Curriculum Vitae) bi dr Dytsche Akademy vu dr Naturforscher Leopoldina, abgruefen am 21. Juli 2018.
• Websyte vu dr Kerstin Krieglstein an dr Uniwersiteet Fryyburg
• Lääbeslauf vu dr Kerstin Krieglstein an dr Uniwersiteet Fryyburg

Fueßnote

Dä Artikel basiert uff ere fräie Übersetzig vu dere Version vum Artikel „Kerstin_Krieglstein“ vu de dütsche Wikipedia. E Liste vu de Autore un Versione isch do z finde.