Dialäkt: Züritüütsch

S Chnaabeschüüsse – oder wie me früener im Tialäkt gsäit hät: de Chnaabeschüüsset[1] – isch es Volksfäscht z Züri. Das Fäscht findt all Jaar im Hèrpscht statt, und zwar im Septämber am Wuchenändi vor em Bätttaag.

Ehremäldig für en Täilnämmer vom Chnaabeschüüsse 1925

Das tradizionell Fäscht gits i der aktuelle Form sit 1899. Im Zäntrum stönd d Schüüsswettkämpf, wo öppe 5000 Buebe und sit 1991 au Mäitli um de Titel vom Schützekönig reschp. vo de Schützekönigin kämpfed. Mitmache törfed ali Jugetliche, wo im Kanton Züri woned oder deet i d Schuel gönd. Für s Startgält vo zwölf Franke chunt mer Munizioon und e Bradwurscht über.

Gschosse wird mit em Sturmgwehr 90. Dèè, wo am mäischte Pünkt macht, chunt es Priisgält vo 5000 Franke über (Stand 2020).

De Fäschtplatz isch im Albisgüetli under em Üetlibèèrg. Bis is 19. Jarhundert isch de Chnaabeschüüsset im Siilhölzli gsii.

Dezue ane cha mer uf em Fäschtplatz e Chilbi bsueche – di grööscht vo de ganze Tüütschschwiiz.

Weblink ändere

  Commons: Knabenschiessen – Sammlig vo Multimediadateie

Fuessnoote ändere

  1. Schwiizerischs Idiotikon, Band VIII, Spalte 1440 f., Artikel Chnaben-Schiesset.