Konrad I. vu Zährige

Dialäkt: Undermarkgreflerisch

Dr Konrad I. vu Zährige (* um 1090; † 8. Jänner 1152 z Konschtanz) isch Herzog vu Zährige gsi un ab 1127 Rektor vu Burgund. Är het anne 1120 zämme mit syym Brueder Berthold III.s Stadträcht an Fryybeg vergee.

Konrad I. verleiht Freiburg das Stadtrecht, Glasmolerei vum Fritz Geiges (1899)

Dr Konrad I. uf ere Bildplatte vum Franz Xaver Hauser (1738–1819) im Fryybeger Minschter

Dr Konrad isch noch em Dod vu syym Brueder Berthold III.anne 1122 Herzog vu Zährige wore. Är het si di meischt Zyt vu syym Läbe gege d Machtuusbreitig vu dr Staufer gstellt un het si doderzue mit dr Welfe verbindet.

Anne 1127 isch er in e Ussenandersetzig mit em Rainald vu Burgund grote, wel beedi Aaspruch gstellt hän uf di burgundische Besitzige vu s Konrads Näffe Wilhelm vu Burgund, wu umbrocht woren isch. Doderby het dr Zähriger vu dr Situazion brofitiert, wu dr dytsch Chenig din gsi isch: wel dr Lothar III. Unterstitzig brucht het gege d Staufer, syyni Rivale, isch er fir d Aasprich vum Konrad yydrätte. Die vu dr Gegesyte het er abglähnt mit dr umstrittene Begrindig, dr Rainald sej syyre Verbflichtig zur Aawäseheit am Hof nit noochuu. Glyychzytig het er an dr Konrad dr Titel vun eme Rektor vu Burgund vergee, e Art cheniglige Stellverdrätter.

Wu dr Konrad III. anne 1138 d Chenigschrone un dodermit d Macht ergriffe gha het, het sich s Verhältnis zue dr Staufer wider entspannt, un eso hän d Zähriger bis in di spote 1150er Johr zue dr drejschte Barteigänger vu sällene ghert.

Dr Konrad isch anne 1152 gstorbe un isch im zährigische Huuschloschter Sankt Peter byygsetzt wore.

Eh un Chinder

Konrad isch ghyrote gsi mit dr Clementia vu Luxemburg-Namur (Huus Namur). Är het mi ihre die Chinder gha:

• Adalbert, Grinder vu dr Linie vu dr Herzeg vu Teck
• Berthold IV., Herzog vu Zährige
• Clementia, Frau vum Heinrich em Leeb
• Rudolf, Erzbischof vu Mainz.

Literatur

• Eberhard Holz / Wolfgang Huschner (Hrsg.): Deutsche Fürsten des Mittelalters. Edition Leipzig, Leipzig 1995, ISBN 3-361-00437-3
• Gerd Tellenbach: Konrad, Herzog von Zähringen. In: Neue Deutsche Biographie (NDB). Band 12, Duncker & Humblot, Berlin 1980, ISBN 3-428-00193-1, S. 533 f.
• Georg von Wyß: Konrad, Herzog von Zähringen. In: Allgemeine Deutsche Biographie (ADB). Band 16, Duncker & Humblot, Leipzig 1882, S. 634–638.

Weblink

 Commons: Konrad I. vu Zährige – Sammlig vo Multimediadateie

• genealogie-mittelalter.de

Dä Artikel basiert uff ere fräie Übersetzig vu dere Version vum Artikel „Konrad_I._von_Zähringen“ vu de dütsche Wikipedia. E Liste vu de Autore un Versione isch do z finde.