Kyniska

D Kyniska (altgriech. Κυνίσκα) isch e Spartaneri, wo as ersti Frau en olympische Siig gwune hett. Ere sis Grab isch z Sparta am Platanistas gstande.

D Kyniska isch d Töchter vom spartanische König Archidamos II. usem Gschlecht vo de Eurypontide gsii. Si hett aigni Ross uufzoge und ane 396 und 392 v. Chr. de Siig im Füli-Vierergspann errunge. Si isch zwoor de Wage nöd selber gfaare, denn Fraue hend nöd a de Olympische Spiil töre tailnee. De Siig hett si, wie doozmool Bruuch gsii isch, as Bsitzeri vo de Ross gwune.

D Kyniska hett drufabe z Olympia Bronzerooss im Zeustempel uufstele loo. De Bildhauer Apelleas hett e Siigerstatue errichtet. Ufeme Marmorsockel isch de Rennwage mitem Wagefaarer gstande und e Statue vo de Kyniska. De Sockel mit de Inschrift isch uusgrabe wore und 1896 publiziert wore.

Quellen

• Xenophon, Agesilaos 9.6
• Plutarch, Agesilaos 20
• Pausanias: Raise z Griecheland 3.8.1; 3.15.1; 5.12.5; 6.1.6

Literatur

• Karl-Wilhelm Welwei: Kyniska. In: Der Neue Pauly (DNP). Band 6, Metzler, Stuttgart 1999, ISBN 3-476-01476-2, Sp. 969.