Louis d’Affry

Dr Louis Auguste Philippe Frédéric François, 2ème Comte d'Affry (* 8. Februar 1743 z Freiburg im Üechtland; † 26. Juni 1810 z Freiburg) isch dr erst Landamma vo dr Schwiiz gsi (1803), Fäldmarschall in französische Dienst und Schultheiss vo dr Stadt Freiburg in dr Schwiiz.

Porträt vom Louis d'Affry in dr Galerii vo de berüehmte Schwiizer vo dr Neuziit, 1882

Läbenslauf

Dr d'Affry isch am 8. Februar 1743 z Freiburg in der Schwiiz as Sohn vom Graf Louis Augustin d'Affry us ere Freiburger Patrizierfamilie uf d Wält cho. Wil si Vater in französische Solddienst gstanden isch het er sini Usbildig am Collège Louis-le-Grand z Paris übercho.

In junge Johr isch er scho Fähnrich vo dr Generalkompanii vo dr königliche Schwizergarde z Paris gsi. Noch mehrere erfolgriiche Chriegsiisätz isch dr Affry 1766 in dr Kompanii vo siim Vater zum Hauptmä ufgstiige. 1780 isch er Brigadier, 1784 Fäldmarschall und Kommandant vom Orde Ordre royal et militaire de Saint-Louis und het 1791/92 dr Oberbefähl über die französische Druppe im Departement Haut-Rhin gha, het aber Frankriich zsämme mit sim Vater verloo, nochdäm die schwiizerische Druppe in französische Dienst noch em Tuileriesturm entloo worde si.

Vo 1765 aa het er dr «Root vo de Sächzig» z Freiburg gleitet, d Versammlig vo de herrschende Bürgerfamilie vo dr Stadt. Wo dr Napoleon vor de Door vo Freiburg gstanden isch, het dr d’Affry siine Druppe e sinnlose Kampf erspart. Wo d Stadt am 2. März 1798 kapituliert het, isch die Alti Eidgenosseschaft ändgültig undergange und Freiburg isch Deil vo dr Helvetische Republik worde. An dr helvetische Consulta 1803 z Paris het dr d’Affry zwüsche de verstrittene Parteie as Vermittler fungiert. Wo d Mediationsakte in Chraft dräte isch, isch er vom Napoleon, wo ihn persönlig kennt het, 1803 zum erste Landamma vo dr Schwiiz und Schultheiss vo Freiburg i.Üe. ernennt worde. In de Johr 1804–1810 het er ohni vil Erfolg brobiert, die schwiizerischi Neutralität z verdeidige, und het vom Napoleon in de Befreijigschrieg (1809) zahlriichi Vollmachte übercho. Dr Louis d'Affry het d Allianz zwüsche dr Schwiiz und Frankriich in dr Ziit vo de napoleonische Fäldzüg in Europa massgäblig brägt und gältet as ein vo de wenige Landammanne vo dr Schwiiz vo internationalem Format.

Literatur

• Gisi: Affry, Ludwig August Philipp Graf d’. In: Allgemeine Deutsche Biographie (ADB). Band 1, Duncker & Humblot, Leipzig 1875, S. 135 f.
• Georges Andrey, Alain-Jacques Czouz-Tornare. Der erste Landammann der Schweiz: Louis d'Affry 1743-1810. Baden: hier + jetzt, Verlag für Kultur und Geschichte|Hier + Jetzt, 2012. ISBN 978-3-03919-225-0.

Weblingg

• Alain-Jacques Czouz-Tornare: Affry, Ludwig von. In: Historisches Lexikon vo dr Schwiiz.
• Werke von und über Louis d'Affry im Katalog Helveticat der Schweizerischen Nationalbibliothek
• Websiite vo dr Résidence Affry z Freiburg mit Bilder vom Louis d'Affry

Dä Artikel basiert uff ere fräie Übersetzig vu dere Version vum Artikel „Louis_d’Affry“ vu de dütsche Wikipedia. E Liste vu de Autore un Versione isch do z finde.