Landamma vo dr Schwiiz

Dr Landamma vo dr Schwiiz isch en Art Staatsoberhaupt vo dr Schwiiz zur Ziit vo dr Mediation vo 1803 bis 1813 gsi. S Amt und vor allem si Inhalt, won em nume wenig Kompetänze ge het, isch d Idee vom Napoleon Bonaparte gsi, wo eso d Schwiiz het welle kontrolliere.

Noch dr Mediationsverfassig het die Schwiizerischi Eidgenosseschaft sächs Vorört gha, Freiburg, Bärn, Solodurn, Basel, Züri und Luzärn. Die hai jedes Johr in dere Reihefolg abgwächslet. Dr Schultheiss oder Bürgermeister vom Vorort isch Landamma vo dr Schwiiz worde und het dr Vorsitz vo dr Dagsatzig übernoh, het dr diplomatisch Verchehr mit em Usland gleitet und d Ufsicht über d Kantön gha. Im Gegesatz zum Landamma vo dr Mediation het dr Landamma vo dr Schwiiz während dr Helvetik noch dr Verfassig vo Malmaison as Vorsitzende vom Chliine Root, dr Regierig vom helvetische Eiheitsstaat, sehr vil meh Macht usgüebt. Die meiste vo dene Kompetänze si in dr Mediation an d Kantön zruggee worde.

Mit em Bundesvertrag vo 1815 isch s Amt vom Landamma vo der Schwiiz ufghobe worde.

Amtsinhaber

Die folgende Magistrate si Landammanne vo dr Schwiiz gsi:

• Louis d'Affry (Freiburg), 10. März – 31. Dezember 1803 und 1809
• Niklaus Rudolf vo Wattewyl (Bärn), 1804 und 1810
• Peter Glutz-Ruchti (Solodurn), 1805
• Andreas Merian (Basel), 1806
• Hans vo Reinhard (Züri), 1807 und 1813
• Vinzenz Rüttima (Luzärn), 1808
• Heinrich Daniel Balthasar Grimm vo Wartefels (Solodurn), 1811
• Peter Burckhardt (Basel), 1812

Die Funktion sött nit mit dere vom kantonale Landamma verwächslet wärde.

Weblingg

• Andreas Fankhauser: Landammann der Schweiz. In: Historisches Lexikon vo dr Schwiiz.

Dä Artikel basiert uff ere fräie Übersetzig vu dere Version vum Artikel „Landammann_der_Schweiz“ vu de dütsche Wikipedia. E Liste vu de Autore un Versione isch do z finde.