Polydoros

De Polydoros (altgriech. Πολύδωρος) isch e König vo Sparta gsii usem Gschlecht vo de Agiade. De König usem Gschlecht vo de Eurypontide zu sinnere Zitt isch de Theopompos gsii. Er isch z Sparta as geert wore, as di Biamte mit em Bild vom Polydoros gsiglet hend.

De Polydoros isch de Soo vom Alkamenes und de Vatter vom Eurykrates. Zo sinnere Zitt isch de Ersti Messenische Chrieg uusbroche. De Polydoros isch bim Volch biliebt gsii, well er as üüsserst grechte Richter ggolte hett. Er isch vom Adlige Polemarchos ermordet wore.

Quelle

• Herodot, Historie 7.204
• Pausanias, Raise z Griecheland, 3.3.1-3; 3.11.10

Literatur

Mischa Meier: Polydoros. In: Der Neue Pauly (DNP). Band 10, Metzler, Stuttgart 2001, ISBN 3-476-01480-0, Sp. 55–56.