Agiade

D Agiade (altgriech. Ἀγιάδαι, Agiadai) sind ais vo de baide Königshüser z Sparta gsii, s ander sind d Eurypontide gsii. D Agiade söled vorneemer as die gsii sii. Z Sparta hend immer zwee König gliichzittig gherrscht.

Abstammig

Baid Familene hend sich as Noofaare vom Herakles aaglueget, und zwoor öber de Hyllos, Kleodaios, Aristomachos und Aristodemos. De söll mit sinene Brüedere Temenos und Kresphontes d Heraklide i d Peloponnes gfüert haa. Si hend s Land underworffe und uuftailt. Debii hett de Aristodemos Lakonie öberchoo. De Aristodemos isch mit de Argeia ghüroote gsii hett Zwilling ghaa, de Eurysthenes, de Stammvatter vo de Agiade, und de Prokles, de Stammvatter vo de Eurypontide. Binamst wore sind d Agiade nochem Agis, em Soo vom Eurysthenes.

Agiade wo König gsii sind

Eurysthenes, Soo vom Aristodemos.
Agis, Soo vom Eurysthenes.
Echestratos, Soo vom Agis. Underwerffig vo de Kynoureer.
Labotas, Soo vom Echestratos. Chrieg gege Argos.
Doryssos, Soo vom Labotas.
Agasilas I., Soo vom Doryssos. De Spartaner Lykourg hett Gsetz erloo.
Archelaos, Soo vom Agasilas I. Eroberig vo de Stadt Aigys.
(Menelaos. Er werd nume inere spoote Chronographii gnennt.)
Teleklos, Soo vom Archelaos. Eroberig vo Amyklai und Pharai. Er isch vo Messenier im Hailigtum z Limnai töödt wore.
Alkamenes, Soo vom Teleklos. Zerstörig vo de Stadt Helos.
Polydoros, Soo vom Alkamenes. 1. Messenische Chrieg. Gründig vo Kolonie z Süüditalie.
Eurykrates, Soo vom Polydoros.
Anaxandros, Soo vom Eurykrates. Er hett im 2. Messen. Chrieg ganz Messenie underworffe.
Eurykratidas oder Eurykrates II., Soo vom Anaxandros und vo de Leandris.
Leon, Soo vom Eurykratidas. Chrieg gege Tegea.
Anaxandridas II., Soo vom Leon. Siig öber Tegea.
Kleomenes I. (520-490 v. Chr.), Soo vom Anaxandridas II. Chrieg gege Argolis.
Leonidas I. (490-480 v. Chr.), Halbbrüeder und Schwigersoo vom Kleomenes I. Et hett a de Schlacht vo de Thermopyle tailgnoo.
Pleistarchos (480-459 v. Chr.), Soo vom Leonidas I..
Pleistoanax (458-445 / 426-408 v. Chr.), Soo vom Pausanias, Enkel vom Kleombrotos, Grossenkel vom Anaxandridas II.
Pausanias (445-426 / 408-395 v. Chr.), Soo vom Pleistoanax. Chrieg gege Athen.
Agesipolis I. (395-380 v. Chr.), Soo vom Pausanias.
Kleombrotos I. (380-371 v. Chr.), Brüeder vom Agesipolis I. Er isch i de Schlacht bi Leuktra gfalle. Sparta verlüürt Messenie und sini Vormachtstellig z Griecheland.
Agesipolis II. (371-370 v. Chr.), Soo vom Kleombrotos I.
Kleomenes II. (370-309 v. Chr.), Brüeder vom Agesipolis II.
Areus I. (309-265 v. Chr.), Soo vom Akrotatos, Enkel vom Kleomenes II.
Akrotatos (265-262 v. Chr.), Soo vom Areus I.
Areus II. (262-254 v. Chr.), Soo vom Akrotatos.
Leonidas II. (254-242 / 241-235 v. Chr.).
Kleombrotos II. (242-241 v. Chr.), Eltere nöd bikannt.
Kleomenes III. (235-222 v. Chr.), Soo vom Leonidas II.
Agesipolis III. (219-215 v. Chr.), Enkel vom Kleombrotos II.

Stammbomm

Stammbomm vo de Agiade und Eurypontide noch Agiaden. In: Paulys Realencyclopädie der classischen Altertumswissenschaft (RE). Band III,1, Stuttgart 1897, Sp. 0065–0068.

Quelle

Pausanias: Raise z Griecheland 3.2-6.

Literatur

Karl-Wilhelm Welwei: Agiadai. In: Der Neue Pauly (DNP). Band 1, Metzler, Stuttgart 1996, ISBN 3-476-01471-1, Sp. 256–257.