Dr rewisionistisch Zionismus
Dr Rewisionistisch Zionismus isch e bürgerligi, antisozialistischi und radikaali Richdig vom Zionismus. Iiire Gründer isch dr Wladimir Zeev Jabotinsky gsi, wo glaubt het äär sig dr woori Noochfolger vom Theodor Herzl, won er eso bewunderet het.[1] Die rewisionistischi Frakzioon het dr Zionismus, wo vo dr Gedankewält vom Chaim Weizmann dominiert worde isch, welle under d Lupe nee und nöi bewärte. Dr Weizmann, wo in dere Zit dr Bresidänt vo dr Zionistische Wältorganisazioon gsi isch, häig sich noch dr Aasicht vom Jabotinsky z weenig für en äigene Staat iigsetzt.[2] D Rewisioniste häi die britischi Entschäidig, Dransjordanie vom Mandaatsgebiet für Palestina abzdrenne, welle „rewidiere“.[3] Dr rewisionistischi Zionismus het verschidnigi Bardeie vom rächte Spektrum z Israel füürebrocht, bsundrigds d Cherut bzw. iiire Noochfolger Likud.[4][5]
(In dr Middi vo de 1930er Joor)
D Rewisionistische häi sich an bürgerlige und nazionaale Beweegige orientiert, sogar au am italiänische Faschismus. Dr Geegesatz zu dr sozialistische Ströömig, wo im Zionismus vorgherrscht het, isch immäns gsi [6] wie au dr Hass zwüsche de bäide Beweegige. Nid ghulfe het s, ass dr Lechi um Avraham Stern, wo Däil vo dr rewisionistische Beweegig gsi isch, baraat gsi isch, mit de Nazi z kollaboriere.
Dr Draum vo de Zioniste, ass im ene äigene jüüdische Staat s jüüdische Volk chönn sicher si, het sich eso nid erfüllt. Israel isch wäge dr findlige Haltig vo sine Noochberstaate zwunge gsi, si Existänz as Staat mit Gwalt z verdäidige. Im Juni 1967 het Israel denn im Säggsdaagchrieg en Allianz vo arabische Staate besigt und mit dr egüptische Sinai-Halbinsle und em Gasasträife, de sürische Golanhööchene und mit em Westjordanland, wo vo Jordanie annektiert worde isch, witeri Gebiet vo Eretz Israel erooberet. Dä Driumf het e nazionaali und religiöösi Öiforii usglööst und dr alt zionistisch Gäist wiiderbeläbt. Au d Diskussioon über d Gränze vo Israel isch wider usbroche. Gliichzitig isch d Awoda as füerendi zionistischi Bardei in Froog gstellt worde, wil si käi schnälli Besiidlig vo de bsetzte Gebiet het welle, aber daas isch e rächt Zionismus vo zentraaler Bedütig gsi.[7] Das isch äine vo de Gründ gsi, ass 1977 dr Likud zum erste Mol dr Ministerbresidänt gstellt het und die sozialistisch-zionistischi Beweegig in dr Regierig abglööst het.
Grubbierige
ändereUs em Rewisionistische Zionismus si die Grubbierige entstande:
- Cherut, e politischi Bardei, gründet 1948
- Irgun Tzwaʾi Leʾumi, e Miliz, vo 1931 bis 1948
- Betar, e Jugendorganisazioon, gründet 1923
- Likud, e politischi Bardei, gründet 1973
Litratuur
ändere- Yaacov Shavit: Jabotinsky and the Revisionist Movement, 1925–1948. Frank Cass, London 1988, ISBN 0-7146-3325-9.
- Joseph Heller: The Stern Gang: Ideology, Politics and Terror, 1940–49. Frank Cass, London 1995, ISBN 0-7146-4558-3.
- Ofira Gruweis-Kovalsky: The Revisionist Movement and the British Mandate for Palestine. In: Israel Studies 26, Heft 3 (2021) S. 179–195.
Fuessnoote
ändere- ↑ Michael Brenner: Die Entwicklung des politischen Zionismus nach Herzl, Bundeszentrale für politische Bildung, 28. Merz 2008
- ↑ Ann-Kathrin Biewener: Säkularisierung im Heiligen Land? Universität Potsdam, abgruefen am 10. November 2019.
- ↑ Martin Kloke: Die Entwicklung des Zionismus bis zur Staatsgründung Israels in Europäische Geschichte Online, 3. Dezämber 2010
- ↑ Michael Wolffsohn, Andreas Bönte: Israel. In: Udo Steinbach, Rüdiger Robert: Der Nahe und Mittlere Osten. Politik, Gesellschaft, Wirtschaft, Geschichte, Kultur. Band 2. Leske + Budrich, Leverkusen 1987, S. 145–174, do S. 162–163.
- ↑ Eva-Maria Schrage: Israel: Identitätskonstruktion im Spannungsfeld von Staat, Religion und Nationalismus. In: Rüdiger Robert u. a.: Kollektive Identitäten im Nahen und Mittleren Osten. Studien zum Verhältnis von Staat und Religion. Waxmann, Münster u. a. 2010, S. 419–437, do S. 427.
- ↑ Eric Hobsbawm: Das Zeitalter der Extreme. Weltgeschichte des 20. Jahrhunderts. München/ Wien 1995, ISBN 3-446-16021-3, S. 170.
- ↑ Israels Siedlungspolitik, Grundlagen des Nahostkonfliktes. In: bornpower.de, abgrüeft am 30. Merz 2018.
|
Dä Artikel basiert uff ere fräie Übersetzig vum Artikel „Revisionistischer_Zionismus“ vu de dütsche Wikipedia. E Liste vu de Autore un Versione isch do z finde. |