Richard Kissling

Der Richard Kissling isch am 15. April 1848 im soledurnische Dorf Wolfwil uf d Wält cho und am 19. Juli 1919 z Züri gstorbe. Er isch e Schwiizer Bildhauer gsi.

s Alfred Escher-Dänkmool z Züri

Zerscht het der Kissling as Stukkatöör gschaffet, und denn isch er uf Rom ggange, won er drizää Joor lang gläbt het. I der Schwiiz met men en gleert gchönne, wonner uf der Landesuusstellig z Züri anne 1883 e Büschte vom Politiker und Undernäämer Alfred Escher, wo eis Joor vorhär gstorben isch, zeigt het. Drufabe het men em grad der Uuftrag ggä, zum Adänke a dä Maa en grosse Brunne mit emene Dänkmool füre Escher z mache. Das Monumänt stoot vor em Zürcher Hauppaanhof.

Psunders bekant isch em Kissling sin Tell, s Dänkmool ufe Wilhelm Tell z Altdorf im Kanton Uri.

Anderi bedüütendi Wärch vonnem sind öppe d Figuure und Büschte und Grabschteine oder Dänkmööler vom Herzog Karl Wilhelm Ferdinand vo Braunschweig-Wolfenbüttel, vom Karl Culmann, em Arnold vo Mälchtal, em Gottfrid Chäller, em Benedikt Fontana und ufe Vadian.

Mit em Ferdinand Hodler, em Rudolf Koller und em Albert Welti het er 1897 d Künstlervereinigung Züri ggründet. Er isch Eerebürger vo Züri und Altdorf gsi. Sis Grab isch im Zürcher Fridhof Sylfäld.

Literatur

• Erich Schenker: Kissling, Richard. In: Historisches Lexikon vo dr Schwiiz.
• Hans Trog: Richard Kissling. In: Die Schweiz, Nr. 8, 1904, S. 393–399.
• Wilhelm Ludwig Lehmann: Richard Kissling. In: Neujahrsblatt der Zürcher Kunstgesellschaft, 1920.
• Marianne Matta: Richard Kissling (1848-1919), der schweizerische «Nationalbildhauer» im 19. Jahrhundert. Bemerkungen zu einigen Denkmälern und Denkmalentwürfen. In: Zeitschrift für schweizerische Archäologie und Kunstgeschichte, Nr. 2, 1981, S. 151–161.

Weblink

 Commons: Richard Kissling – Sammlig vo Multimediadateie

• Susanne Schrödter: Kissling, Richard. In: Sikart (Lexikon un Datebank zue dr Chunscht in dr Schwyz un im Firschtetum Liechtestei).